Фото: ашық дереккөз
«Сіздерге жолдап тұрған депутаттық сауалымды 3 мың баланың көз жасы, 6 мың ата-ананың соңғы үміті деп қабылдаңыздар. Елімізде 3 мың бала микротия және атрезия патологиясына шалдыққан. Қарапайым тілмен айтсам, бұл сәбилер құлақсыз туған», деді Нартай Сәрсенғалиев.
Депутаттың айтуынша, бір құлақсыз туатын бөбектер Қазақстанда мүгедек санатына жатқызылмайды. Сәйкесінше, оларға жәрдемақы мен зейнетақы төленбейді. Осы тұста мәжілісмен Қазақстанда мүгедектік алу үшін екі құлақ та болмауы керек екенін айтты.
Айта кетсек, микротия және атрезия патологиясының емі өте күрделі. Құлақтың ішіне жасалатын отаны АҚШ хирургтары жасайды. Өткен жылы бір құлаққа жасалатын операцияның құны 99 000 доллар болған, ал биыл 105 200 доллар. Оған қоса науқас 1 ай бойы дәрігерлердің бақылауында болу керек.
«Естімейтін баланың үнін естіртейін деп ата-аналары үкіметке жүгінген еді. Мынадай ресми жауап алыпты: «Әлеуметтік медициналық сақтандыру қоры» КЕАҚ деректерііне сәйкес микротия және атрезия патологиясы бар балалар бюджет қаражаты есебінен шетелге емделуге жіберілетін балалар санатына жатпайды және медициналық көмек сапасының мониторингі департаментінің «Мұқтаж науқастар» тізіміне енгізілмейді». Соңғы үміттерін арқалаған ата-аналар ақырында «Қазақстан халқына» қорына барыпты. Бірақ қор да қор қылып қайтарыпты. Қазақстанда аталған дертті емдейтін маман жоқ. Құлақсыз туған, естімейтін балалардың жанайқайын құлағы бар билік өкілдерінің еститін кезі келді ғой?», деп қынжылды депутат.
Мәселенің шешімін табу мақсатында Нартай Аралбайұлы өз ұсыныстарын да ортаға салды.
«Микротия және атрезия патологиясына шалдығып, бір құлақсыз туған балаларға да мүгедектіктің берілуін қамтамассыз етуіңізді сұраймын. «Қазақстан халқына» қоры арқылы аталған дертті емдеу үшін балалардың АҚШ-қа баруын қамтамасыз ету қажет, тиісті қаражат бөлу керек. Шешімді жедел қабылдау шарт, себебі бұл дерт балалардың екінші сау құлағының есту қабілетін нашарлатып жібереді», деді депутат.
Сөз соңында Нартай Сәрсенғалиев қауіпті дертпен күресу және отандық медицина сапасын көтеру мақсатында Қазақстанның білікті дәрігерлерін АҚШ-қа оқуға жіберуді ұсынды.
