Қазақ футболының тарихына көз жүгіртсеңіз, жерлестеріміздің бұған дейін ешқашан Еуропа біріншілігіне дәл мұншалықты жақын болмағанын, бұған дейінгі бірде-бір іріктеу сайыстарында ұпай санын 10-нан әріге асыра алмағанын, осы күнге дейінгі іріктеу ойындарында Суоми елінің сайыпқырандарымен жасыл алаңда сан мәрте жолықса да, ешқашан жеңе алмай келе жатқаны сияқты өкінішті жайттарға қанық боласыз. Енді бұл – тарих. Кешегі күннен бастап қазақ футболында тарихтың жаңа парағы ашылды. Финляндияға сапар шеккен футболшыларымыз тамаша камбэк жасап, футбол жанкүйерлерін бір серпілтіп тастады. Осы бір ғажап жеңістен кейін Берлинге барар жолда небәрі екі-ақ қадам қалды. Сондай-ақ тарихта бірінші рет ұпай саны 15-тен асып, турнир кестесінде көшбасшылармен иық тірестіріп келеді. Ең бастысы, қазақ футболшыларына алынбайтын қамал, жеңілмейтін құрама болған Финляндия ақыры тізе бүкті. Және финдерді жай ғана жеңіп қоймай, өз алаңында, керек десеңіз сан мыңдаған жанкүйерінің көз алдында жер қаратып жеңдік.
Осы матчтан бірер күн бұрынғы Даниямен өткен ойында жерлестеріміз жеңілсе де жігерлі ойынымен жанкүйерлерді ұятқа қалдырған жоқ. Алаң қожайындары қанша жерден азулы болса да, біздің жігіттер дат футболшыларына қасқайып қарсы тұра алды. Алаңның әрбір шебінде олардан бір мысқал да кем ойнаған жоқ. Осы кездесуді теледидар арқылы тамашалаған еліміздегі футбол жанкүйерлері де, аяқдоп мамандары да Финляндиямен нағыз тартысты ойын болатынын іштей сезіп, сол ойында бір ғажайыптың боларына сенім білдірген-ді.
Ал Хельсинкидегі матч Қазақстан үшін де, Финляндия үшін де тағдыршешті маңызды ойынның бірі еді. Өйткені жеңіске жеткені Еуроға шығу мүмкіндігін сақтап қалса, жеңілгеніне Еуроға шығу арманын тағы да төрт жылға кейінге шегере тұруына тура келеді. Бірақ Қазақстан құрамасы жеңіліп қалса да пәлендей ештеңе жоғалта қоймас еді, өйткені біздің Ұлттар лигасының плей-офф кезеңі арқылы да Берлинге баратын мүмкіндігіміз сақталып тұр. Финдерде мұндай мүмкіндік жоқ.
Сол себепті де алаң қожайындары бірінші таймда не бел, не белбеу кетеді деген оймен алғашқы минуттан алға қарай тұра ұмтылды. Мақсаты тезірек гол соғып, әрі қарай ойынды өз бақылауларында ұстау болатын. Әйткенмен біздің қорғанысқа жауапты жігіттеріміз аса сауатты өнер көрсетіп, қақпамызға гол соғуға еш мүмкіндік берген жоқ. Шабуылдан түк шығара алмаған алаң қожайындары гол соғудың сырын стандартты жағдайдан іздей бастады. Алдымен олар үш минутта үш мәрте бұрыштама добын теуіп көріп еді, онысынан да нәтиже шығара алмады. Кейіннен 27-минутта Александр Марочкин айып алаңына жақын маңайда қарсыластың ойыншысын ереже бұзу арқылы тоқтатты. Сөйтіп, финдер тағы бір стандартты жағдайға ие болды. Шамамен 20-25 метр жерден Роберт Тэйлордың қақпаға қарай тепкен жойқын соққысын әуелде Игорь Шацкий қайтарғандай болып еді, бірақ Шацкийдің қолына тиіп өткен доп бәрібір қақпа торынан табылды – 1:0. Осы голдан кейін финляндиялықтар қорғанысқа көбірек көңіл бөле бастады.
Матчты толық тамашалаған жанкүйерлер сөзімізді қуаттайтын шығар, ойынның екінші бөлігі бізге Қазақстан мен Дания арасындағы бірінші ойынды еске түсірді. Сол кездесудегідей бұл матчта да ойын тағдырын бір пенальти түбегейлі өзгертіп жіберді. Және бұл 11 метрлік айбын добын тағы да Бақтияр Зайнутдинов сәтті орындады. Даниямен болған ойында да Бақтияр гол соққаннан кейін Тағыберген мен Айымбетов мергендік танытса, бұл жолы бар жүкті Зайнутдинов өз мойнына алып, Финляндия қақпасына бір емес, екі гол соқты. Екі голдың арасы – бар болғаны 13-ақ минут.
Осылайша, Қазақстан құрамасының футболшылары Суоми елінде өткен ойында тарихи жеңіске қол жеткізіп, тағы бір тарихи сәтті жаңартуға маңызды қадам жасады. Енді біздің жігіттер өз алаңымызда Сан-Мариномен (17 қараша), сырт алаңдағы Словения (21 қараша) құрамасымен өтетін екі ойында да жеңіске жетсе, ел футболшылары Берлиндегі ала доп аламанында алғаш рет доп тебеді.
PS: Осы ойында екі мәрте дәлдік танытып, мергендігімен көзге түскен Бақтияр Зайнутдинов өзінің ұлттық құрама жейдесіндегі 14-голын соғып, сұрмергендер көшінде жеке-дара көш бастады. Бұған дейінгі үздік көрсеткіш еліміздің даңқты футболшысы, қазіргі таңда ұлттық құрама бас бапкерінің көмекшісі болып жүрген Руслан Балтиевке тиесілі еді. Ол өз мансабында 13 мәрте дараланған. Сондай-ақ кешегі матчтан кейін ұлттық құрама ойыншыларының барлық турнирде соққан гол саны 251-ге жетті.
