Ұлт ұстазын бойтұмар еткен

Мектепте еңбек етіп келе жатқанына қырық жыл бол­ған Сәбира Ізба­сарқызы ұлт ұс­тазын бойтұмары санайды. Бала кезінен Ақаңның шы­ғармашылығына ерекше сүйіс­пеншілікпен қарай­ды. Қай­раткерлігіне, ілім мен білім жо­лын­дағы ізде­ністеріне, еңбегіне ерте кезден қаныққан мұғалім мынаны мақсат етеді: «Қазақ бала­ларына Алаш қайраткері­­нің ізгілігін ұқтыра беру ке-рек».

Сол мақсат үдесінде үл­кен еңбек жасайды. Ақаң есімін мектепке беру үшін қа­лалық, облыстық форумдар өткізуге мұрындық болады. Жылда түрлі конферен­ция өткізеді. Мұнымен қо­са оқушыларды Ақаңның шы­ғармашылығына бағытталған ғылыми зерттеу жұмыстарына баулиды.

Биыл Ақаң атындағы мек­тепке – 60 жыл. Былтыр 150 жыл­дық мерейлі датасында аталған білім ордасы ұлт ұс­та­зын лайықты ұлықтады. «Ахмет Байтұрсынұлының педагогикалық мұрасы» атты қазақ тілі мен әдебиеті пәні мұғалімдерінің үлкен форумы өтті. Сол форум ая­сын­да «Ахметтану» кабине­ті­нің тұсауы кесілген-тін. Ка­бинеттің жетекшісі – С.Ізба­сарқызы. Мұнда Ахмет Бай­тұр­сынұлының кітаптары мен еңбектері бар. Әр партаға ноутбук қойылған. Сондай-ақ кабинетте көрсетілген QR код арқылы А.Байтұрсынұлының еңбектерімен таныса алады. Бұған қоса ататек шежі­ресі жазылған стенд ілі­ніпті. Бұл оқушылардың ізде­нісімен әзірленген. Мектеп мұғалімдері «Ахмет. Ұлт ұстазы» атты қойылым да қой­ған болатын. Соның сце­на­рийін де Сәбира ұстаз жаз­ған.

– Мектебімізде 2014 жылдан бері «Ахметтану» курсы өткізіледі. Ұлы ұстаздың сан қырлы шығармаларын жетік білу үшін «Ахметтану» курсының арнайы бағдар­ламасы жасалған болатын. Міне, кабинет ашылғалы бері курсымызды осында өткіземіз. Қазіргі күні пед­а­гогикалық бағытын зерттедік. Енді экономикалық жағынан зерттеуді бастап жатырмыз. Бұл жөнінде де қайраткер тұлғаның еңбектері көп. Бұл кабинет – өскелең ұрпақты зерттеушілік, шығармашылық қабілетін дамытып, қала­мының ұшталуына сеп болсын деген ниетпен ашылды. Әр оқушының бойында Ахмет ғибраты болуы керек, – дейді қазақ тілі мен әдебиеті пәнінің мұғалімі С.Ізбасарқызы.

Ол Ақтоғай ауданы Қы­зыларай ауылындағы мектепті тәмамдап, Алматыдағы Абай атындағы педагогикалық инс­титутқа оқуға түседі. Мұхтар Мағауин, Серік Қирабаев, Нығмет Ғабдуллин, Серік Әбілқаев, Фатима Мұсабекова секілді үлкен ғалымдардан дәріс алады. Мәртебелі мұға­лімнің өзі «әдебиетке, ғы­лымға сол кісілердің тағы­лымы жол ашты. Менің өмі­рім­дегі ең үлкен жетістігім де – осы», дейді.

Екінші курс оқып жүр­ген­де Ғабиден Мұстафин шы­ғар­м­аларына ғылыми зерттеу жүр­гізіп, сыйлыққа ақын Қа­­дыр Мырза Әлінің шағын кі­табын алыпты. Ескірген кітапты қолына ұстап, сонау институт қабырғасындағы студенттік шағын сағына еске алады.

Алғаш еңбек жолын Ақ­тоғайдың Ақши ауылын­дағы мектептен бастайды. «Ауыл мектебі мен үшін үлкен тәжірибе болды. Ауыл бала­ла­рына сегіз жыл білім беріп, қалаға қоныс аудардық. Бұған дейін Нығмет Нұр­ма­қов, Әлихан Бөкейхан атын­­дағы мектептерде де са­бақ бер­дім. Қалаға келіп те ұстаздық тәжірибемізді әрі қарай жетілдірдік. Ең үлкен жетіс­тігім – шәкірттерім. Белгілі қа­ламгер Төлен Тілеубай бас­та­ған бір­неше журналистке са­бақ бер­дім. Жылда бірнеше оқу­шым жоғары оқу орнына грантқа түседі», дейді ол.

Мәртебелі мұғалім 1997 жылы «Білім беру ісінің үздігі» төсбелгісімен марапатталса, жақында ғана Мемлекет басшысының қолынан «Қа­зақ­станның еңбек сіңірген Құрметті ұстазы» атағын ал­ды. Көп жылғы еңбегі еленген С.Ізбасарқызының ізгілікті ізі осындай.

Қарағанды облысы