Жолтай – сайын Сарыарқаның шұрайлы бір аймағы, қойнауы ырыс, жайлауы тыныс Жаңаарқа ауданы Қараағаш ауылының тумасы. Әкесі Боранқұл өткен ғасырдағы колхоз, совхоз шаруашылықтарының қалыптасу, даму кезеңдерінің барлығын өз қолымен өткерген, қандай жұмысқа болсын ілкімді, ісмер, шебер, шаруақор адам еді. Әрдайым, жылдың төрт мезгілі, таңның атысы күннің батысы, бірі аяқталса екінші басталып жататын науқандық жұмыстардың басы-қасында жүретін. Айналасындағы ағайын-туғанды, отбасын үйіріп ұстайтын, араларын жарастырып, туыстық тінін бекітіп отыратын беделді ақсақалдың осы еңбексүйгіштік қасиеті барша балаларына да жұғысты болды. Жолтай жастайынан айыр, күрек тұрмақ, ауыл шаруашылығының барлық өндірісіне көзі қанықты, етене болып өсті.
Он жылдық мектептен соң аудан орталығындағы механизаторлар даярлайтын курсты оқып бітірді. Үлкен еңбек жолын туған ауылында механизатор болып бастады. Т-40 тракторының руліне отырып шөп шапты. Алып К-700 тракторын тізгіндеп, жер жыртты, шаруашылық өнімдерін тасымалдады. Ауыл дәулетінің еселеп артуына елеулі септігін тигізді. 1979-1981 жылдар аралығында әскер қатарында азаматтық борышын өтеді.
1987 жылы аудан орталығы Атасу кентіне қоныс теуіп, темір жол саласының қалпына келтіру пойызы мекемесіне Т-330 бульдозерінің машинисі болып жұмысқа орналасты. Содан беріде, биылғы зейнет жасына жеткенге дейін осы мекемеде табан аудармай, қалтқысыз қызмет атқарды. Ұзақ жыл сонарында ортақ іске деген үлкен жауапкершілік, тиянақтылықпен еңбек ете жүріп, кәсіпорынның майталман мамандарының біріне айналды.
Жаңаарқа стансасына қарасты қалпына келтіру пойызының іргетасы 1936 жылы қаланыпты. Қозғалыс болған соң қауіп болмай тұрмайды. Темір жол торабында қандай да бір апат орын ала қалған жағдайда оның салдарын жою міндеті ең алдымен осы қалпына келтіру пойызына жүктеледі. Сол ыңғайда желілік қалпына келтіру пойызы тасымалды тоқтаусыз жүргізу ісіне лайықты үлес қосты. Межесі биік, жұмысы жүйелі, жетістіктері еселі, бірлігі мықты ұжым әрдайым сенім үдесінен, жеңіс тұғырынан көріне білді. Осындай толайым табыстарда білікті маман, іскер азамат Ж.Ысқақовтың да өзіндік қолтаңбасы бар.
«Ел сенімінен шығу жолында жұмылған жұдырықтай жұмыс істеу – басты міндет. Бекітіліп берілген техниканы сақадай сай дайындықта ұстау үшін оның күтіміне аса ұқыптылықпен қарау қажет. Бұзыла қалса, ақауы болса мезгілінде жөндеп қою керек. Мекеме кезекшісіне апат туралы хабар түсісімен, күндіз-түн демей, 40 минутта жиналып жолға шығып кетеміз», дейді Жолтайдың өзі.
Еселі еңбек бағалануымен баянды. 40 жылға жуық уақыт бір мекемеде, бір орында тапжылмай, қапысыз қызмет ете білген тәжірибелі маман, озат еңбеккердің төккен тер, еткен қызметі бірқатар салалық марапатпен аталып өткен. Құрмет грамоталары, алғыс хаттар, мерекелік медальдар легі – өз алдына бір төбе. 2011, 2016 жылдары «Қазақстан темір жолы» ҰК» АҚ Президентінің Құрмет грамотасымен марапатталды. 2022 жылы Жаңаарқа ауданы әкімдігінің «Жыл үздігі» аталымы бойынша «Өз мамандығының үздігі» атанды.
Ж.Ысқақов сонша жұмыстың сыртында өнегелі отбасы иесі, асыл жар, ардақты әке, ұлағатты ата. 1988 жылы аудан тұрғыны Ләззатпен жанұя құрды. Ерлі-зайыптылардың берекелі шаңырағында екі ер бала өсіп-тәрбиеленді. Үлкені Жасын, кішісі Кемел – екеуі де бүгінде жоғары кәсіптік білімі бар мамандар, екеуі де әке жолын қуып теміржол торабында, локомотив депосында машинист болып жұмыс істейді. Балалары да үйленген, олардан өрбіген немерелер – ата-әже көзқуанышы, үй базары.
Жолтай аға бүгінде мерекесі жарқын жаздай, берекесі алтын күздей болып жеткен мерейтойы – зейнет демалысына шыққан қазыналы қуанышын бастан кешіріп жатыр. Атпал азамат бүкіл саналы ғұмырында бел шешпей еңбек етіп, ердің ері көтеретін жүкті арқалады. Көңілінің кеңдігі мен мұқалмас қайрат-жігері, адамдық, ағайындық қатынастардағы ақберен адалдығы мен кішіпейілділігі, сөзге сараң, іске мығым қарапайым болмысы, сүттей ұйыған отбасы берекесі – кез келген адамды қызықтырарлықтай үлкен тәлім-тәрбие үлгісі.
