Аймақтар • 07 Желтоқсан, 2023

Көпке үлгі іс

165 рет
көрсетілді
3 мин
оқу үшін

Атырау облысында қиналған жанға қайырымдылық көрсетіп жүрген еріктілер аз емес. Облыс әкімі аппаратының басшысы Нұрлыбек Жеңісбекұлының айтуынша, қазір 57 волонтерлік топ пен қай істі де ерінбей атқаруға құлшынып тұрған 712 ерікті тіркелген.

Көпке үлгі іс

«Волонтерлер әсіресе пандемия кезіндегі ахуалды жеңілдетуге көп үлес қосты. Қазір әр салада ерікті болып, мейірімділік пен жауапкершіліктің үлгісін көрсетіп жүргендер көп. Олардың барлығы қайырымдылық іс-шараларына қатысып, қарттарға, көпбалалы, аз қамтылған отбасыларға қол ұшын созады. Бұл – көпке үлгі болатын іс», дейді Нұрлыбек Жеңісбекұлы.

Ал облыстық «Азаматтық ор­талық» КМК басшысы Жанат Досқалиеваның айтуынша, түрлі волонтерлік ұйыммен, жастар ресурстық орталықтарымен, қала мен ауылдардағы волонтерлік клубтармен тығыз байланыс орнаған. Сондай клубтың қатарында «28 ілмек» те бар. Қазір бұл клубтың құрамында 50-ге жуық ерікті топтасқан. Олар 11 жылдан бері шала туған нәрестелерге таза жүннен киім тоқып беріп жүр.

Бұл өңірдегі танымал еріктінің бірі – Арман Қасымов. Мұнай-газ компаниясында қаржыгер мамандығымен жұмыс істейді. Бірақ 12 жылдан бері бос уақытын жедел жәрдем дәрігерлерімен бірге өткізіп келеді. Бастапқыда санитар болған. Кейін жедел жәрдем көлігін жуған. Қазір ол науқастарға жүрек-өкпе реанимациясын, кардиограмма жасауды үйреніп алған.

«Жақында волонтерлік ұйым­­­­­дардың жұмысына қолдау көрсету үшін «Demeý» байқауы  ұйым­дастырылды. Оның қорытын­ды­­­сымен үздік танылған 5 жоба ие­сіне 500 мың теңгеден берілді. Біз еріктілер қатарынан аға буын өкілдерін де көбірек көргіміз келеді. Өйткені ерікті болу үшін жас шектеуі жоқ. Қазір 50 жастан асқан адамдар арасында «Күміс волонтерлікті дамыту» жобасы қолға алынды. Жобаның басты мақсаты – аға буын өкілдері арасында бастамашыл топтар құру, әлеуметтік мәселелерді шешуге жәрдемдесу, қайырымдылық, экологиялық іс-шараларды ұйымдастыру, ұрпақтар сабақтастығын арттыру. Алдыңғы буын өкілдерінің өзін-өзі дамытуына, белсенді болуына ықпал ету, саламатты өмір салты үшін қолайлы жағдайлар жасау. Бұл жоба аяқталғанымен, қарт кісілер жаңа достар тапты. Осы жоба арқылы бір-бірін ұнатып, үйленгендер де бар», дейді Ж.Досқалиева.

Байқауға қатысқан Әсия Құл­жа­нованың жобасы жоғалған адам­дарды іздестіруге арналған. Ол же­тек­шілік ететін «Батыс» волон­терлік тобының еріктілері із-түз­сіз жоғалып, хабарсыз кеткен жан­дардың суреті мен дерегін іліп, іздеу жұмысын жүргізеді. Мәсе­лен, Атырау облыстық полиция департаментінің басшысы Нұрхат Оразбаевтың мәліметінше, жыл басынан бері жоғалған адамдарды іздестіру жұмыстарына 5 мыңнан астам ерікті жұмылдырылған. Волон­терлік топ 40-тан астам жасөс­пірімнің аман-есен табылуына атсалысқан.

Тағы бір ерікті Арман Арапбеков мұнайлы шаһардағы мектептердің ауласына жеміс ағаштарын егуді қолға алған. «Өмірге құштар» жобасының бастамашыл тобы ерек­ше көмекті қажет ететін және тұрмысы төмен отбасылардың ба­лаларының үйірмелерге тегін ба­руына көмектеседі. Ал «Аса қажет» жобасының еріктілері Иса­тай ауданындағы мектептің бірі­не ұсақ моториканы дамытуға арнал­ған құралдар әкеліп берді. «Ер жүрек­тілер» ұйымына біріккен жастар «Үйден бір қадам» жобасы аясында Махамбет ауданындағы Сарай­шық қалашығына бір күндік тур ұйымдастырып жүр.

 

Атырау облысы