Құрамына Қазақстан, Тәжікстан, Түрікменстан, Өзбекстан кіретін Халықаралық Аралды құтқару қоры Арал теңізін сақтауға және өңірдің экологиялық жағдайын жақсартуға, сондай-ақ жалпы әлеуметтік-экологиялық проблемаларды шешуге бағытталған бірлескен мемлекетаралық экологиялық және ғылыми-практикалық бағдарламалар мен жобаларды іске асырумен айналысады.
«Біз Орталық Азия мемлекеттерімен, сондай-ақ басқа да халықаралық ұйымдармен және қаржы институттарымен ынтымақтастықты арттыруды көздейміз. Биыл біз Дүниежүзілік банкпен бірге жүзеге асырылып жатқан Солтүстік Аралды сақтау жобасының екінші кезеңін бастауды жоспарлап отырмыз. Арал теңізін құтқару – ХАҚҚ-ға қатысушы барлық елдің бірлескен күш-жігері арқылы ғана орындалатын міндет. Алдағы үш жылда біз осы бағытта маңызды нәтижелерге қол жеткізуге ниеттіміз», деді Су ресурстары және ирригация министрі Нұржан Нұржігітов.
1993 жылдың 26 наурызында ХАҚҚ құрылтайшылары – Орталық Азия елдерінің басшылары Қызылорда қаласында саммитте бас қосып, Арал теңізі және оның маңындағы экологиялық аймақтың әлеуметтік-экономикалық дамуын қамтамасыз ету мәселелерін шешуде бірлесе қызмет ету туралы мәлімдеме қабылдады. Арал дағдарысы салдарларымен күресті Халықаралық Аралды құтқару қоры үйлестіріп отырады. БҰҰ-ның Даму бағдарламасымен, Экологиялық бағдарламасымен, ЮНЕСКО, Бүкіләлемдік банк, Азия даму банкі, ТАСИС ұйымдарымен, сонымен қатар Германия, Дания, Израиль, Канада, Нидерланд, АҚШ, Швейцария, Швеция және басқа да донор елдер үкіметтерімен біріге отырып, ХАҚҚ аймақтың әлеуметтік және экологиялық проблемаларын шешуге бағытталған түрлі жобалар мен бағдарламалар жүргізіп келеді.
