«Natural Gas + H2» бірлескен жобасы «жасыл сутегі» өндірісін құруға және оны табиғи газбен оңтайлы араластыруға бағытталған. Жаңа технология атмосфераға бөлінетін көмірқышқыл диоксиді қалдықтарын азайтуға және экологияны жақсартуға жол ашады. Университет ғалымдары тәжірибелік-өнеркәсіптік учаскеде алынған нәтижелер бойынша жаңашылдықты Алматы мен Ақтау қалаларындағы жылу электр орталықтарына енгізуді ұсынатын болады.
«Еуразия ұлттық университетінің ғылыми әлеуеті зор әрі мықты кадрлары да жеткілікті. Біз ғалымдарымыздың ғылыми зерттеулерін қолдауға басымдық береміз. Университет зерттеушілері өнеркәсіптік кәсіпорындардың ауаны ластау деңгейін төмендету үшін ғылымды қажетсінетін және экологиялық таза жаңа технологияларды әзірлеу бағытында белсенді еңбек ететінін атап өткім келеді. Біздің профессор Қайрат Күтербековтің жетекшілігімен ғалымдар тобы алғаш рет елімізде сутегі энергетикасы технологияларын дамыту жобаларына бастамашылық танытып, оларды іске асырды. Бұл меморандум шеңберіндегі халықаралық ынтымақтастық экологиялық таза сутегін өндіру және пайдалану бағытында қанатқақты жобаларды қолға алуға мүмкіндік береді. Бірлескен күш-жігеріміздің нәтижесі экологияны едәуір жақсартатын және зиянды қалдықтарды азайтатын отын өндірісінің жаңа технологиялық желісінің іске қосылуы болады деп сенемін», деді университеттің стратегиялық даму жөніндегі проректоры Думан Айтмағамбетов.
Университет ғалымдары сутегі энергетикасы саласында 15 жылдан бері ғылыми қызметпен айналысып келеді. Білім ордасында Еуразиялық физика-энергетикалық зерттеулер және ғылымды қажет ететін технологиялар институты табысты жұмыс істеп тұр. Өткен жылы университет пен «Алматы электр стансалары» АҚ қоршаған ортаны қорғау және газ-сутегі отынының қоспасын пайдалану бағытында ынтымақтастық пен өзара іс-қимыл туралы меморандумға қол қойғанын айта кеткен жөн.
