Фото: vlast.kz
Ұлттық статистика бюросы Атырау облысы бойынша департаментінің басшысы Нұржан Құмарғалиевтің дерегіне сүйенсек, кейінгі бес жылда өңір тұрғындарының саны 57 мың 900-ге артыпты. Өсім – 9 пайыз. Шаһар тұрғындары – 10,6, ал ауылдықтар қатары 7 пайызға ұлғайған. Тұрғындардың көбеюіне әсер ететін басты фактор – туу көрсеткіші. Осы тұрғыдан айтқанда, былтырғы 11 айда 15 мың 156 сәби дүниеге келді. Оның ішінде 7 892 ұл, 7 264 қыз бар. Табиғи өсім – 12 мың 20 адам. Өткен жылы 3 980 неке қиылса, 396 некені бұзу туралы акт жазбасы тіркелген.
Мұнайлы өңірден 27 мың 953 адам көшіп кеткен. Мәселен, сыртқы көші-қон бойынша – 121 адам, оның ішінде ТМД елдеріне – 74, әлемнің басқа мемлекетіне 47 адам қоныс аударған.
«Атырау облысына өзге өңірлерден көшіп келгендер де бар. Олар – 26 мың 34 адам. Оның ішінде сыртқы көші-қон желісімен 562 адам келген. Нақтылай айтқанда, ТМД елдерінен – 533, ал әлемнің басқа мемлекеттерінен 29 адам қоныс аударды. Ал Қазақстанның басқа өңірлерінен 6 441 адам Атырау өңіріне тұрақты тұруға шешім қабылдады. Мәселен, Ақтөбе облысынан – 18,9, Астанадан – 16,6, Маңғыстау облысынан келгендер үлесі – 15,8 пайыз», деп мәлімдеді Нұржан Құмарғалиев.
Атырау облысы
