«Altyn Bank» төтенше жағдай нәтижесінде қаржылық жағдайдың растай отырып, заңды және жеке тұлғалардың қарызы бойынша төлемдерді кейінге қалдыруға байланысты қарыз алушылардың өтінішін қарайды. Өтінішті «Altyn-i» мобильді қосымшасына немесе электрондық поштаға ([email protected]) жіберуге болады. Қарыздарды қарау және кейінге қалдыру үшін комиссия алынбайды.
«Freedom Bank» те әкімдіктен алынған тізімге сүйене отырып, тасқыннан зардап шеккен жеке тұлғалар мен жеке кәсіпкерлердің несиесі бойынша төлемді кейінге қалдыру рәсімін ұсынады. Шегерім 3 ай мерзімге – 2024 жылдың 1 сәуірінен 30 маусымына дейін күшінде. Су басқан өңір тұрғындарының бұл банктегі кредиті үшін айыппұл мен өсімпұл есептелмейді. Ал өтінім берудің тәртібі қарапайым.
Қол қойылған өтінішті [email protected] почтасына немесе + 7 776 159 55 95 whatsаpp нөміріне жолдау қажет. Банк өтінішті 15 күнтізбелік күн ішінде қарайды.
«Банк ЦентрКредит» те қаражат бөлумен және кредит бойынша төлем мерзімін кейінге жылжытумен қатар су тасқынынан зардап шеккендерге филиалдық желі арқылы көмек көрсетіп жатыр.
«Зардап шеккен өңірлердегі өкілдеріміз өңірлік билікпен байланысып, керек-жарақтың бәрін алып жатыр. Сондай-ақ қызметкерлеріміз бірнеше қалада бөгеттерді нығайтуға ерікті ретінде қатысып жүр. Алматыдағы банк қызметкерлері өңірлерге жөнелту мақсатында медициналық препарат, балалардың керек-жарағы, шаруашылық тауарлары мен гигиеналық құралдар түрінде гуманитарлық көмек жинап жатыр», делінген мәлімдемеде.
Несие төлемін шегеру мүмкіндігін ұсынған екінші деңгейлі банктер арасында «Nurbank» те бар. Бұл қаржы институты да 2024 жылдың 1 сәуірі мен 30 маусымы аралығында несие төлемін кейінге қалдыру бастамасын жүзеге асырады. Сонымен қатар айыппұл мен өсімпұл есептелмейді.
«Тасқын салдарынан шаруашылығына зиян келген барлық жеке кәсіпкерлерді, шағын және орта бизнес субъектілерінің берген өтініші негізінде несие бойынша төлемдерді кейінге қалдыру мүмкіндігі ұсынылады. Өтініш беру үшін банк бөлімшесіне келу керек немесе онлайн өтінім қалдыру қажет», делінген хабарламада.
Банк сайтында «Жеке тұлға үшін өтінім» және «Заңды тұлға/жеке кәсіпкер үшін өтінім» деген екі үлгі көрсетілген. Несие төлемін кейінге қалдыру үшін соны толтырып, өтініш жолдау жеткілікті.
«Bank RBK» клиенттері несиені төлеуді кейінге шегеру үшін [email protected] электрондық поштасына еркін нысанда өтінішті жіберу немесе бөлімшеге жеке бару арқылы жүгіну қажет. Кейінге қалдырудың максималды кезеңі осы жылдың 1 сәуірінен 30 маусымына дейін.
«Жергілікті атқарушы органдар ұсынған тізімдерде көрсетілген клиенттерге кейінге қалдыру клиенттің өтінішінсіз автоматты түрде беріледі. Қарыз шарттарын өзгерту мәселелері бойынша шешімді банктің тиісті уәкілетті органы қабылдайды. Клиенттің кейінге қалдыру туралы өтінішін қарау үшін комиссия алынбайды. Кейінге қалдыру кезеңінде өсімпұл мен айыппұл есептелмейді. Клиенттің өтініші бойынша банктің уәкілетті органының оң шешімі болған кезде банк қызметкері қажет болған жағдайда клиентті қарыз шартына/кепіл шартына тиісті қосымша келісімге қол қою үшін банк филиалына шақырады», делінген мәлімдемеде.
ВТБ Банк (Қазақстан) ұсынатын шарттар да тап осындай. Үш ай мерзімге кейінгі қалдыруды ұсынады, айыппұл мен өсімпұл қоспайды. Егер клиент кейінге қалдыру мерзімін үш айдан да ұзартқысы келсе, банк ол мәселені жеке тәртіппен қарайды. Кейінге қалдыру мүмкіндігін алуға еркін үлгімен банкке өтініш жазу керек. Өтінішті бөлімшеге апарып беруге немесе [email protected] поштасына жолдауға болады. Бизнес өкілдері өтінішті «VTB Business» интернет-банкі арқылы немесе сайт арқылы бере алады. Ұсынылатын құжаттар: форс-мажор туралы құжат, бизнесті жүргізетін орыннан фотоесеп және басқа да құжаттар.
«ForteBank» су тасқыны салдарынан қаржылық жағдайы нашарлаған қарыз алушы жеке тұлғалардың төлемдерді кешіктіргені үшін қалыптасқан айыппұлдары мен өсімақыларының күші жойылады деп хабарлады.
«Су тасқынынан зардап шеккен ШОБ қарыз алушылардың қолданыстағы қарызы бойынша қарызды 3 күнтізбелік айдан аспайтын мерзімге ұзарту мүмкіндігімен, комиссиясыз және құжаттар топтамасын ұсынбай, кейінге қалдыру мерзімі берілсін. Жергілікті атқарушы органдардың тізіміне сәйкес зардап шеккен қарыз алушылар банк бөлімшесіне келмей-ақ, төлемдерді кейінге шегеруге және кредиттерін қайта құрылымдауға банктің forte.kz ресми сайты арқылы өтініш бере алады», деп мәлімдейді.
Мұндай мүмкіндікті елдегі беделді микроқаржы ұйымдары (МҚҰ) «KMF» пен «Solva» да ұсынады.
«Бәйтерек» холдингіне қарасты «Аграрлық несие корпорациясы» мен «ҚазАгроҚаржы» компаниялары да тасқыннан зардап шеккен қарыз алушылар төлемін кейінге шегереді.
«2024 жылғы кестенің барлық төлемі 2025 жылдан бастап біркелкі төлемдермен қаржыландыру мерзімінің соңына дейінгі төлемдерге теңдей бөлінеді. 2024-2025 жылдары қарызы аяқталатын жобалар бойынша қызмет бағытына байланысты төлемі 24 айға дейінгі мерзімге ұзартылады. Бұл көктемгі егін егу және күзгі жиын-терін жұмыстарынан бөлек барлық бағытқа қолданылады. Ал осы бағыттағы қарыз алушылар бойынша қайта құрылымдауға/ұзартуға өтінімдерді қарау егін жинау науқаны аяқталғаннан кейін жүргізіледі. Су тасқыны салдарынан зардап шегіп, несие төлемін кешіктірген азаматтарға айыппұл салынбайды, өсімпұл есептелмейді», деп мәлімдеді.
«Аграрлық несие корпорациясы» мен «ҚазАгроҚаржы» жұмысты жылдамдатуға аз ғана құжаттың негізінде өтінім қараудың жеңілдетілген үдерісін бекіткен.
Өтініш беруші «Аграрлық несие корпорациясы» мен «ҚазАгроҚаржы» тізімінде болмаған жағдайда форс-мажорлық жағдайдың туындағанын растайтын аудандық деңгейден төмен емес жергілікті атқарушы органдардан құжат әкелуге тиіс. Алайда көрсетілген шарт пен тәртіп 2024 жылдың 1 сәуіріндегі жағдай бойынша «Аграрлық несие корпорациясы» мен «ҚазАгроҚаржы» алдында мерзімі өткен берешегі 90 күннен асқан қарыз алушыларға қатысты емес. Дегенмен мұндай қарыз алушыларды қолдау мақсатында тұрақсыздық айыбын есептеу 2024 жылдың 1 сәуірінен 30 маусымына дейін тоқтатылады.
