Елордада өткен «Қозғалыстағы әлем. Олимпиада, Паралимпиада және Дүниежүзілік көшпелілер ойындары – бірлікте» атты бұқаралық іс-шараға Олимпиада чемпиондары, Паралимпиада ойындарының жүлдегерлері, әлем чемпиондары Серік Сәпиев, Светлана Подобедова, Раушан Қойшыбаева сынды саңлақтар спорттық іс-шараға қатысушыларға сәттілік тіледі.
Ұлттық Паралимпиада комитетінің бас хатшысы Олжас Ақпамбетов ұлы аламанға лицензия иеленіп, жаттығуды үдеткен спортшыларға жеңіс тілеп, саңлақтарымызды қолдауға үндеді.
«Францияның Париж қаласында өтетін Паралимпиада ойындарына қатысушылар спорттың 9 түрінен додаға түсу жоспарланып отыр. Әзірге біздің спортшыларымызда 12 лицензия бар, алда әлі де жолдама таратылатын турнирлер болады. Біз пара спортшыларға сәттілік тілеп, қашанда жанкүйерлік танытамыз. Осындай игілікті іс-шаралар өткізу паралимпиадалық қозғалыстың дамуы мен инклюзивті қоғамның нығаюына әсерін тигізеді», деді О.Ақпамбетов.
Пауэрлифтингтен Рио Паралимпиадасының күміс жүлдегері, әлем кубогінің жеңімпазы Раушан Қойшыбаева еліміздің ірі қалаларында пара спортшылардың алаңсыз жаттығатын орталықтары салынса, әлемдік додалардағы деңгейіміз бұдан да биіктей түсетінін жеткізді. «Астана қаласында параспорттан дайындық жүргізетін олимпиадалық кешен бар. Сондай спорттық орталық Алматыда Алатаудың бөктерінен бой көтерсе, қандай ғанибет! Барлық қалада салынбаса да ірі мегаполисте болса, спорттық жетістігіміздің артуына орасан септігі тиер еді. Мен пауэрлифтинг спортына 45 жасымда қатыстым, 50-ге толғанда Рио Паралимпиадасының күміс медалін олжаладым. Демек мүмкіндік жас талғамайды, тек тынбай тер төгіп жаттығу қажет. Париж паралимпиадасына лицензия иеленген спортшыларымыз мерейімізді асыратынына сенімдімін», деді Р.Қойшыбаева.
XVII жазғы Париж-2024 Паралимпиада ойындарына еліміздің спортшылары пара жеңіл атлетика, парапауэрлифтинг, паратаеквондо, параүстел теннисі, паражүзу, парадзюдо, параканоэ, отырып ойнайтын волейбол және параоқ атудан қатысуды межелеп отыр.
