Жоғарыда аталған дербес білім беру ұйымының басқарма төрағасы Әнуар Жанғозин өз сөзінде Назарбаев зияткерлік мектептері әрқашан өз тәжірибесін бөлісуге дайын екенін айта келіп: «Біздің назарымыз, әсіресе ауыл мектептеріне түсті. Сондықтан балалардың сапалы білім алуы үшін отандық мектептердің ішкі әлеуетін бірлесіп дамытып жатқанымызға қуаныштымыз», деді ол.
Целиноград ауданының Қараөткел ауылындағы мектеп базасында 30 ауылдық білім ошағының директоры мен орынбасары стратегиялық жоспарлау әдістерінің технологиясымен танысып, мектепті дамыту бағдарламасын әзірлеуді үйренді. Сондай-ақ мектеп бойынша деректер негізінде шешім қабылдау және қабылданған басқарушылық шешімдердің тиімділігін бағалау дағдыларын пысықтады.
Жоба аясында Назарбаев зияткерлік мектептері ұйымының Педагогикалық шеберлік орталығы Целиноград ауданының мектептерінде педагогтердің кәсіби қажеттіліктеріне зерттеу жүргізіп, сабақтарды бақылау және жаңа оқу жылында 30 ауыл мектебінің басшылары мен мұғалімдеріне арналған бірнеше біліктілікті арттыру курсын, семинар мен шеберлік сағатын ұйымдастырады.
– Назарбаев зияткерлік мектептерімен бірлескен жобаның нәтижесі бірнеше ауылдық перспективті білім ордалары базасында құрылатын педагогикалық академия болмақ. Оның жұмысы ұстаздардың тұрақты кәсіби дамуына бағытталады. Ол үшін біз Педагогикалық шеберлік орталығымен бірге тренерлерді даярлаймыз, – дейді «ESEN Foundation» қорының өкілі Камила Башарова.
