Ізгі мақсатқа үндеген іс-шара

InEcoFest-2024 мерекесінің Бас ботаникалық бақта ұйым­дастырылуының өзіндік мәні бар. Бұл – алматылықтар мен қала қонақтарының сүйікті демалыс орны, айнала мен адам­ға қамқорлық жарасымды үй­ле­сім тапқан инклюзивті алаң. Ботаникалық ғылым орталы­ғын­да жанға жайлы демалыс орнын қалыптастыруға ұмтылыс әлемнің түкпір-түкпірінен біре­гей өсімдіктер жинаудың ма­ңы­зынан кем түспейді. Баққа кіру мүгедек адамдарға әрқашан тегін. Таза ауызсу бұрқақтары, демалуға арналған ыңғайлы орындықтар, пандустар мен санитарлық, сондай-ақ жүріп-тұруы қиын азаматтарға арналып жабдықталған бөлмелер әрбір келушінің қажеттілігі барынша ескерілгенін көрсетіп тұр. Отбасылық мереке кең көлемді танымдық және ойын-сауық бағдарламасын ұсына отырып, адамдарды бір-біріне құрметпен қарауға, табиғатқа жанашырлық танытуға жұмылдырады.

«Адам – экожүйенің бір бөлігі, қоғамның толыққанды қатысушысы. Ендеше, өмір сү­ріп отырған ортамызға жауапкершілікпен қарау – жо­ғары мәдениеттің белгісі. Ерекше қажеттілігі бар жандарды біріктіруге, заманауи дағ­дыларға үйретуге, өз әлеуетін толық ашуға шабыттандыру арқылы тең мүмкіндіктер ту­ғызуға көмектесетін қоғам құру маңызды», деп атап өтті «IteachMe» қоғамдық қорының директоры Захира Бегалиева.

Фестивальдың серіктесі «Шев­рон» компаниясы 1993 жылы ынтымақтастық орнаған сәттен бастап еліміздің мұнай-газ саласын дамытуға үлес қосумен қатар, әлеуметтік жобаларды да жан-жақты қолдауға басымдық беріп келеді. Содан бері компания білім беруді, денсаулық сақтауды жақсартуға және жаңа жұмыс орындарын құруға арналған 400-ден аса жобаға шамамен 500 млн доллар инвестициялады. Ком­панияның Еуразиялық бөлімшесінің келіссөздер және жобалар жөніндегі бас менед­же­рі Гүлзира Өтетілеуова халық­тың өмір сүру сапасын жақсар­ту мен қоршаған ортаны қорғау­ға бағытталған жобаларды қолдау жалғаса беретінін жеткізді.

Қатысушылар өз білім-тәжі­рибелерімен бөлісіп, өсімдік­терді дұрыс отырғызу, сурет салу, қалдықтарды бөлек жинау, роботтехника және флористика бойынша шеберлік сабақтарын өткізді. «Tabigat Labs» жобалар коалициясы экология мәселелеріне урбанистика, әдебиет және білім беру ойындары арқылы үңілуді ұсынды. «Recycle Birge» сарапшылары Жандар Жанәбіл мен Мадина Рүстемова қалдықтар­ды тұрақты тұтыну мен қайта өңдеу қажеттілігіне ден қойды. «Inclusive People» жобасының негізін қалаушы және еліміздегі алғашқы кибер-модель Айман Молдабекова инклюзивті сән­ге деген көзқарасымен бөлісті. ­Жоба модельдерінің мүмкіндік­тің әртүрлілігі мен теңдігін көр­сететін инклюзивті сән шоуы фес­тиваль қағидаларының айқын дәлелі болды. Әйгерім Ізбаса­­рова мен Нюргуян Адамова «Мама Про» әлеуметтік әлсіз топ­тағы әйелдерді қолдау және дамы­ту қорынан ерекше қажеттілік­тері бар балалардың отбасыла­рына мейірімділік сабақтары мен психологиялық қолдау көрсетіп, инклюзивті қоғам шеңберіндегі психологиялық әл-ауқатқа назар аударудың маңыздылығын атап өтті. «Болат Өтемұратов қоры ресурстық орталығының» тренерлері Юрий Чувашев пен Жанна Үмбетова барлық азамат үшін қоғамдық орындарда аутизм спектрі бұзылған адамдармен өзара іс-қимыл­дың маңызын талқылады. «Леруа Мерлен» компаниясы «жасыл» своп, өнер нысандарын жасау үшін пластикалық қақпақтарды жинаудың, флорариумдар мен астаулар жасаудың қыр-сырын үйретті.

Балалар да, ересектер де Бас­­ты ботаникалық бақтың экс­кур­сияларына ерекше ынта-ықылас танытты. ЮНЕСКО-ның Қазақстан Ұлттық клубтар федерациясы мен Қазақстан­ның биоалуантүрлілігін сақ­тау қа­уым­дастығы дайындаған фото және арт-көрмелер қонақ­тар­дың ерекше назарын аудар­ды. «Impact Hub Almaty» қол­да­уымен ұйымдастырылған кітап клубы мен жәрмеңке ала­ңы келушілердің үлкен қы­зы­ғушылығын тудырды. Аутис­тік спектрі бұзылған бала­лар мен олардың ата-аналары қатысқан «Аутизмды жеңе­міз!» орталығының кон­цер­ті адамдар­ды бейжай қал­дыр­мады. Әлеуметтік жоба­лар көр­месі экология мен инклю­зия­ның маңызды бастамалары­мен айналысатын адамдармен та­нысуға мүмкіндік берсе, қайы­рым­дылық жәрмеңкесі жергілікті өндірушілерді қолдай отырып, эко-тауарлар мен қолдан жа­сал­ған бұйымдарды ұсынды.