Фото: instagram.com/mfa_kz/
Жиында Орталық Азияның сыртқы саяси ведомстволарының басшылары алтыншы Консультативтік кездесудің күн тәртібі мен қорытынды құжаттарының жобаларын қарады.
Кеңестің ашылу салтанатында сөз сөйлеген Қазақстан Республикасы Премьер-министрінің орынбасары – Сыртқы істер министрі Мұрат Нұртілеу алдымен әріптестеріне кеңеске қатысуға шақыруын қабылдағаны үшін ризашылығын білдірді.
– Бүгінгі кездесу біздің ортақ қолдауымызды және бесжақты ынтымақтастықты одан әрі нығайтатын міндеттерді айғақтайды. Біз төрағалық шеңберінде атқарылған бірлескен жұмысты қорытындылаймыз, сондай-ақ өңірлік және халықаралық күн тәртібіндегі өзекті мәселелер бойынша пікір алмасуымыз керек. Бұл кездесудің нәтижелі болатынына және Орталық Азия елдері көшбасшыларының саммиті табысты өтетініне сенімдімін, – деді Мұрат Нұртілеу.
Сондай-ақ ол біздің көшбасшыларымыздың саяси еркі мен даналығының арқасында аймақта сенім ахуалы орнағанын атап өтті.
– Жыл сайын өзара тиімді жан-жақты ынтымақтастықты тереңдету үшін жоспарлы жағдай жасалып жатыр. Астанада Орталық Азия мемлекеттері басшыларының алғашқы консультативтік кездесуі өткен сәттен бастап елеулі прогреске қол жеткіздік, – деген еліміздің Сыртқы істер министрі Орталық Азиядағы саяси-экономикалық көрсеткіштерге тоқталды.
Министрдің айтуынша, қазіргі таңда өңір елдерінің жиынтық ІЖӨ шамамен 450 млрд долларды құрап отыр. Нәтижесінде, өзара сауданың тұрақты өсуі қамтамасыз етілді. Сонымен қатар бұл көрсеткіш кейінгі 5 жылда 80%-ға өсіп, 11 млрд долларға жеткен екен.
– Парламенттер, қауіпсіздік кеңестері, салалық ведомстволар желісі бойынша өзара іс-қимыл тетіктері, сондай-ақ әйел көшбасшылар диалогі іске қосылды. Биыл біз практикалық өзара іс-қимылдың жаңа сапалы деңгейіне жеттік. Ұлттық үйлестірушілер кеңесі өз қызметін бастады. Өңірлік кооперациядағы қол жеткізілген прогресс халықаралық қоғамдастықта да үлкен қызығушылық тудырды, сондай-ақ біздің ең жақын стратегиялық серіктестеріміз қолдайды, – деді М.Нұртілеу.
Министр бұған Қытай, Ресей, АҚШ, Үндістан, Жапония, Корея Республикасы, Германия, Италия, сондай-ақ бірқатар көпжақты құрылымның қатысуымен «Орталық Азия+» форматында өткізілген кездесулердің қорытындылары дәлел екенін атап өтті.
Мұрат Нұртілеу кеңес отырысы барысында біздің ел төраға ретінде консультативтік кездесулердің әлеуетін одан әрі нығайту жұмыстарын белсенді атқарғанын айрықша айтып өтті.
– Қауіпсіздік кеңестері хатшыларының, энергетика және ақпарат министрлерінің кездесулері, сондай-ақ Орталық Азия елдері тарихшыларының форумы алғаш рет өткізілді. Осыған байланысты қазақстандық бастамаларды қолдағаны және өнеркәсіп, энергетика, көлік және логистика салаларында бірқатар құжатты дайындау бойынша бірлескен жемісті жұмысы үшін алғыс айтамын. Бүгінгі саммиттің қорытындысы бойынша мемлекет басшылары «Орталық Азия – 2040» өңірлік кооперациясын дамыту тұжырымдамасына қол қоймақ. Осы құжаттарды іске асыру өзара тиімді әріптестікті одан әрі үдемелі дамытуға және біздің өңірдің халықаралық субъективтілігін нығайтуға қызмет ететініне сенімдімін, – деді министр сөзін қорытындылай келіп.
Бұдан басқа, делегаттар кеңес отырысында өңірлік байланысты тереңдету және бесжақты өзара іс-қимылды одан әрі дамыту келешегі туралы пікір алмасып, өңірлік және халықаралық күн тәртібінің өзекті мәселелерін талқылады.
