Олжас Бектенов мемлекет инвестициялық тартымдылықты арттыру, еліміздің өнеркәсіптік әлеуетін ашу, инфрақұрылымдық мәселелерді шешу және экономиканың нақты секторын дамыту бойынша ауқымды жұмыс атқарып жатқанын атап өтті. Ірі бизнес еліміздің технологиялық және инновациялық дамуында маңызды рөл атқарады. Шағын және орта кәсіпкерлікті дамытуға мүмкіндік береді. Талқылау барысында энергетика, өңдеу өнеркәсібі, мұнай-газ секторы, тау-кен металлургия кешені, агроөнеркәсіп кешені, көлік және қаржы, денсаулық сақтау, ІТ, туризм салаларының өкілдері өз ұсынысын білдірді. Металдарды терең өңдеу, мұнай-газ химиясы және басқа да басым салалардағы жаңа жобаларға баса назар аудара отырып, отандық тауар өндірушілерді қолдау мәселелері көтерілді.
Елішілік құндылықты дамытуға ерекше көңіл бөлінді. Үкімет «Атамекен» ҰКП-мен бірлесіп, тауарлардағы, жұмыстар мен көрсетілетін қызметтердегі отандық қамту үлесін айқындау бойынша жаңа әдіснаманы әзірлеп жатыр. Үкімет басшысы жаңа тетік анағұрлым әділ болатынын әрі отандық кәсіпорындардың дамуына елеулі серпін беретінін айтты. Тиісті құрылымдарға жүргізіліп жатқан жұмысты жеделдету тапсырылды. Жасанды интеллект жүйелерін қолдануды кеңейту және цифрлық технологияларды дамыту мәселелері қаралды. Экологиялық таза, энергия үнемдейтін және төмен көміртекті жобаларды іске асыруға бағытталған туризм, тұрғын үй-коммуналдық шаруашылық, «жасыл» қаржыландыру саласын дамытудың маңызды екені айтылды.
Талқылау барысында елімізді тұрақты энергиямен қамтамасыз ету мәселесіне назар аударылды. Бизнес өкілдері Мемлекет басшысының атом энергетикасын дамыту жөніндегі бастамасын қолдап, энергия тапшылығы жағдайында өнеркәсіпті одан әрі дамыту және жаңа нысандарды іске қосу үшін тұрақты әрі сенімді энергияның жаңа көзі қажет екенін атап көрсетті. Осылайша, биыл 6 қазандағы атом электр стансасын салу жөніндегі референдумда оң шешім қабылданған жағдайда елімізде ағымдағы және келешегі бар өндірістердің энергетикаға деген қажеттіліктерін жабуға, жаңа жұмыс орындарын ашуға мүмкіндік болады.
Кездесуді қорытындылай келе, Премьер-министр Президент алға қойған міндеттерге қол жеткізу үшін бизнесті экономиканың нақты секторын дамытуға белсенді тарту қажет екенін атап өтті.
«Мемлекет басшысы елімізді жан-жақты жаңғыртуды белсенді жүргізіп жатыр. Экономикадағы өсім азаматтарымыздың тұрмыс сапасын жақсартуға тікелей әсер етуі керек. Сонымен қатар ірі бизнес әлеуметтік жауапкершілікті көрсетуі қажет. Президент келесі жылды «Жұмысшы мамандықтары жылы» деп жариялағанын білесіздер. Бізде ірі кәсіпкерлер колледждерге қамқорлық жасап, мамандар даярлауға тиісті база құратын сәтті үлгілер бар. Бұл модель сонымен қатар бизнеске болашақ кадрларды даярлауға мүмкіндік береді. «Жұмысшы мамандықтары жылы» аясында мұндай тәжірибені жандандыру қажет», деді О.Бектенов.
Сонымен қатар ауылда кәсіпкерлікті дамыту және ауыл тұрғындарын жыл бойы жұмыспен қамту қажеттігі атап өтілді. Үкімет басшысы тиісті министрліктерге бизнес өкілдері тарапынан айтылған, «жасыл жобаларды» несиелеуден түсетін кіріске төмендетілген салық мөлшерлемесін енгізу, отандық тұқым шаруашылығын дамыту бойынша диқандарды ынталандыру шараларын жетілдіру, отандық аналогтар болған жағдайда импорттық тауарлар мен қызметтерді сатып алуды азайту мүмкіндігін қарастыру сынды ұсыныстарды зерделеуді тапсырды.
