Сурет: ru.freepik.com
Инфрақұрылымды жақсарту мақсатында өңірлердегі кәсіпорындарды жеңілдікпен қаржыландыру тетігі бекітілмек. Осы қаржыға қалдықтарды сұрыптауға әрі қайта өңдеуге арналған заманауи қоқыс таситын машиналар мен жабдықтар сатып алынбақ. Қарыздың сыйақы мөлшерлемесі – 3%. 3 жылдан 15 жылға дейін берілетін қаржыға 185 млрд теңге бөлінді. Тұрмыстық қалдықты өңдеу көлемі 1,5 млн тоннаға дейін артады.
«Нәтижесінде, 232,2 млрд теңге сомаға 94 жоба іріктелді. Жобаларды жүзеге асыру нәтижесінде брусчатка, люк, қоқыс бак, стрейч пленкасы, көлік бампері сияқты тұтыну тауарлары шығарылады», дейді Экология және табиғи ресурстар министрі Ерлан Нысанбаев.
Осы жобалар аясында 4,7 млн тонна тұрмыстық қалдық сұрыпталады. Ал қалдықтарды сұрыптау желілерін салу, жаңғырту мақсатында өңірлерде 21 жоба қолға алынбақ. Бұл кәсіпорындарда жылына 3 млн тоннаға дейін қоқыс сұрыпталса, шығынның жалпы құны 49 млрд теңгеден асады. Мұның ішінде жеке инвестицияның үлесі – 10 млрд теңге.
