2024 жылы компания активтері 38 трлн теңгеге жеткен. Алдағы жылдары қор бұл көрсеткішті 50 трлн теңгеге дейін арттырып, басты мақсаттарының бірі − басқаруындағы активтерінің құнын көбейтуді көздеп отыр.
«2024 жыл күрделі болды: геосаяси ахуал мен мұнай бағасының арзандауына қарамастан, қордың кірісі 17 трлн теңгені құрайды. Бұл 2023 жылмен салыстырғанда 10%-ға жоғары. Ал таза табыс 1,8 трлн теңге болады деп болжап отырмыз», деді қор басшысы Нұрлан Жақыпов.
«Самұрық-Қазына» тапқан табысына қарай мемлекет есебіне де ауқымды қаражат бөлді. Үкіметке 1,3 трлн теңге жіберілген. Сонымен қатар еліміздегі ең ірі жұмыс беруші ретінде қордың еншілес компаниялары мемлекеттік бюджетке 2 трлн теңгеден астам салық төлеген. Бұл – республикалық бюджетке түсетін кірістердің 16%-ы.
Былтыр «Самұрық-Қазына» жалпы құны 700 млрд теңге болатын 4 ірі жобаны жүзеге асырды. Олардың арасында Алматы қаласындағы ЖЭО-2 және ЖЭО-3 нысандарын газға көшіру жобаларын ерекше атап өтуге болады. Соның арқасында 2026 жылға қарай жылу электр орталықтары газбен жұмыс істеп, бұл өз кезегінде Алматының экологиясын жақсартып, тұрғындардың денсаулығы мен қала ахуалына оң әсер етпек.
Энергетикалық қауіпсіздікті нығайту мақсатында 1-МАЭС стансасының алғашқы блогі қалпына келтірілді. Осылайша, электр энергиясының тапшылығы мәселесін шешуге сеп болды. Сонымен бірге Қарашығанақ кен орнында бесінші компрессор іске қосылып, көмірсутек өндірісі жылына 10–11 млн тоннаға дейін ұлғайды. Сиань қаласында құрғақ жүк терминалы іске қосылды.
Қорда шетелдік инвестицияны тарту бойынша да біраз ауқымды жұмыс атқарылды. Мәселен, АҚШ, Қытай сынды алпауыттармен қатар, Германия, Оңтүстік Корея, Франция, БАӘ, Катар сияқты өзге де елдермен бірлескен жобалар жүзеге асырылып жатыр.
2024 жылдың маңызды оқиғаларының бірі – қорға қарасты «Air Astana» әуе компаниясының IPO-сы болды. Компания акциялары Лондон қор биржасында саудаға шығарылып, құнды қағаздар нарығында елеулі орын алды. «Air Astana» акцияларына сұраныс ұсыныстан 3 есе асып, компанияның құны 900 млн долларға бағаланып отыр.
Бұдан бөлек, қор отандық өндірушілерге қолдау көрсетуге ерекше ден қояды. Былтыр тауарлар мен қызметтерді сатып алу рәсімдерін жетілдіру үшін 15 өзгеріс енгізіліп, нәтижесінде отандық ұйымдармен 842 млрд теңгеге, яғни 2023 жылға қарағанда 84%-ға көп келісімшарт жасалған. Қаржы вице-министрі Дәурен Кеңбейілдің айтуынша, мемлекеттік сатып алулардағы отандық өнімдердің үлесі 53–54%-ға жеткен.
«Бұл ретте «Самұрық-Қазына» қорының ауқымды жұмысын атап өткен жөн. Компанияның сатып алу жүйесінде отандық тауар өндірушілердің үлесі 79%-ды құрайды. Бұл – өте жақсы көрсеткіш», дейді Дәурен Кеңбейіл.
Сондай-ақ беделді халықаралық қаржы институттары − Еуропа қайта құру және даму банкі мен Азия даму банкі «Самұрық-Қазынаның» сатып алу ережелеріне жоғары баға берді. Мысалы, биыл ЕҚҚДБ «KEGOC» компаниясын «Самұрық-Қазынаның» сатып алу ережелеріне сәйкес қаржыландырмақ. Аталған ымыраның нәтижесінде еліміздің кей өңірінің тұрғындары қауіпсіз әрі сенімді электр энергиясымен қамтамасыз етіледі.
«Самұрық-Қазынаның» ерекше көңіл бөлетін бағыттарының бірі − қайырымдылық. Былтыр ұлттық компания игі істерге 45 млрд теңге бөлген. Оның 30 млрд теңгесі су тасқынынан зардап шеккен аудандарға бағытталды. Сонымен қатар инклюзия, спорт және медицина салаларында ауқымды жұмыс атқарылып, 15 инклюзия сыныбы, 10 оңалту орталығы мен 10 спорт орталығы ашылған. Ерекше қажеттілігі бар балаларға арналған инклюзивті жазғы лагерьлер ұйымдастырылды. Осылайша, жалпы саны 30 мыңнан астам ерекше балаға көмек көрсетілген. Осымен шектелмей, «Самұрық-Қазына» ұйымы «Қазақстан халқына» қорына 50 млрд теңге аударған.
Бұдан бөлек, қор маусымда Астана қаласында 250 орынға арналған, соңғы үлгідегі заманауи жабдықтармен жабдықталған Ұлттық шұғыл медицинаны үйлестіру орталығын іске қосты. Мұнда ауыр науқастарды жедел жеткізу үшін тікұшақ алаңы да салынған. Ал Н.Д.Батпенов атындағы Ұлттық травматология орталығына құнды жаңа жабдықтар алып берсе, Қызылорда қаласында үстел теннисі орталығын ашқан. Жалпы, былтыр «Самұрық-Қазына» 500 мыңнан астам мұқтаж жанға қолдау көрсетіп, көмек берген.
2024 жылы «Самұрық-Қазына» қоры экономикалық тұрақтылықты сақтауымен және ауқымды әлеуметтік-экономикалық жобаларымен есте қалды. Қор активтерінің өсуі, дивидендтер, инновациялық және әлеуметтік жобалар, қайырымдылық істер – осының барлығы еліміздің тұрақты дамуына үлкен үлес қосып жатыр. Қор биылға бұдан да ауқымды жоспарлар құрып, елдің әл-ауқатын арттыру жолындағы жұмысын жалғастыруды көздейді.
