Сурет: diapazon.kz
Комитеттің мәлімдеуінше, кәсіпкерлік қызметке қатысы бар критерийге сәйкес келетін жеке тұлғалардың шотындағы операцияларды екінші деңгейлі банктер бақылауға алуға тиіс. Сондай критерийдің бірі – үш ай ішінде 100 және одан да көп, әртүрлі тұлғадан бизнеске арналмаған жеке шотқа сомасы 3 төменгі жалақыдан асатын аударымдардың келіп түсуі. Бұл – шамамен 255 мың теңге.
«Жаңа ережеге сәйкес екінші деңгейлі банктер кірістер органдарына мобильді аударымдар туралы ақпаратты кезең-кезеңімен ұсынып отыруға тиіс. 2025 жылы жеке кәсіпкерлер, заңды тұлғалар мен олардың жұбайлары бақылауға алынады. 2026 жылы басқа азаматтар да тексеріле бастайды», делінеді хабарламада.
Елімізде заңсыз кәсіпкерлік қызметке 15 айлық есептік көрсеткіш (АЕК) көлемінде айыппұл салу қарастырылған. Заң бұзушылық екінші рет қайталанса, айыппұл 30 АЕК-ке дейін ұлғаяды. Бұл – 117 960 теңге. Салық салу объектілерін жасырып қалу төленбеген салықтардың 200%-ы мөлшерінде айыппұл салуға әкеп соғады. Мемлекеттік кірістер комитеті өкілдерінің айтуынша, бұл шаралар салық төлеуден жалтару әрекеттерін азайтып, елде бизнесті жүргізуге әділ мүмкіндік қалыптастырады.
Айта кетейік, тауарлар мен қызметтерді ұсынғаны үшін ақысын мобильді аударым ретінде жеке шотқа аударту көлеңкелі кәсіп саналады. Ондай төлемдер үшін салық ұсталмайды, салдарынан қазына түсуге тиіс миллиардтаған қаражаттан қағылады. Сол үшін елде тауарлар мен қызметтер ақысын арнайы кассалық аппарат, QR-код немесе POS-терминал арқылы төлеу міндеттеліп отыр.
Мемлекеттік кірістер комитетінің хабарлауынша, бастапқыда кәсіпкерлер де, тұтынушылар да мұндай қатаң тәртіпке үйренісе алған жоқ. Дегенмен кейінгі уақытта бұған біртіндеп бейімделіп келе жатқандары байқалады. Бұл өз кезегінде кіші, шағын және орта бизнестен түсетін салық түсімін молайтуға септеседі. Алайда комитет аталған субъектілерден түскен салық түсімі сомасын жария етпеді.
