Жүзден – жүйрік, мыңнан – тұлпар

Биыл Жамбыл облысының оқушылары үшін өте табыс­ты жыл болды. Олар биылғы оқу жылында халықаралық, республикалық олимпиадалар мен ғылыми жарыстарда 133 медальді иеленді. Оның ішінде 51 медальді халықаралық білім жарыстарында алыпты. Республикалық пән олимпиадасы мен ғылыми жоба жарысында облыс командасының жүлделі І орынды иеленуі – жамбылдық дарынды оқушыларға берілген лайықты баға екені анық. Осы аптада Жамбыл облы­сының әкімі Кәрім Көкірекбаев халықаралық, республикалық олимпиадалар мен ғылыми жарыстардың жеңімпаздарымен кездесіп, кең отырып әңгімелесті. Биылғы жылғы халықаралық олимпиадаларда жеңіс тұғырынан көрінген дарынды балалар ішінен әсіресе, қазақ-түрік мектеп-интернатының оқушысы, Мәскеу қаласында өткен Халықаралық Менделеев олимпиадасының қола медалінің иегері атанған Әмзебек Азаматты, математика пәнінен Афины қаласында өткен Балқан олимпиадасында қола медаль, халықаралық Жәутіков олимпиадасында күміс медальға ие болған Әбесбек Даниярды, сондай-ақ, осы олимпиадада физика пәнінен күміс медальді иеленген Сегізбай Аянды, математика пәнінен халықаралық Азия-Тынық мұхиты олимпиадасының күміс медаліне қол жеткізген Дінмұхаммед Түзеловті ерекше мақтанышпен айтуға болады. Ал халықаралық «Ғылым әлемін ашамыз» атты ғылыми жарыста екінші орынды иеленген Тараз қаласындағы №1 гимназияның түлегі, «Алтын белгі» иегері Сейсенғали Мәриям кеше ғана өткен ҰБТ-да 119 баллды иеленіп, өз білімін тағы да дәлелдеді. Ұлттық бірыңғай тестілеуде ең жоғарғы 125 балл алған Қазақ­стан бойынша бес түлектің біреуі – Тараз қаласындағы №45 гимназияның оқушысы Гүлназ Ердосова облыс абыройын өсіріп, жамбылдықтарды зор қуанышқа бөледі. Биылғы жылғы тестілеуде мектеп түлек­тері өткен жылға қарағанда, өздерінің жақсы дайындықтарын көрсетті. Облыстың орташа баллы 78,6-ны құрап, 2014 жылмен салыстырғанда 6,2 баллға өсті. «Ұстаздық еткен жалықпас, үйретуден балаға», деп ұлы Абай атамыз айтқандай, ұстаздық  қиын да жауапты, қыр-сыры мол, шығармашылық еңбек. Бұл – бір жағынан үлкен абырой, екінші жағынан жоғары жауапкершілікті талап етеді. Сондықтан да біз­дің елде ұстаз қасиетті тұлға ретінде ерекшеленеді. Қазіргі таңда облыс түлектері әлемнің түкпір-түкпіріндегі ең үздік жоғары оқу орындарында білім алуда. Бұл, әрине, ең алдымен ұстаздардың тынымсыз еңбегінің жемісі. Содан болар Жамбыл облысының әкімі К. Көкірекбаев бұл жиында оқушылармен қатар бірқатар ұстаздарды марапаттап, құрмет көрсетті. – Дарынды жастар – ұлт бо­ла­шағы. Елбасы Н.Назарбаев «Мен жаңа буын қазақ­стан­дық­тарға сенім артамын. Сіздер Жаңа бағыттың қозғаушы кү­шіне айналуға тиіссіздер», деп  жастарға үлкен сенім артты. Осы жас өрендер білімді, тәрбиелі болса – еліміздің ертеңі мықты болады, – дейді К.Көкірекбаев. Міне, осылайша жамбылдық өрендер білім сайыстарында жүзден – жүйрік, мыңнан – тұл­пар шығып, өздерінің бәсекеге қабілеттіліктерін танытты. Оралхан ДӘУІТ, «Егемен Қазақстан». Жамбыл облысы. Суретті түсірген Ақәділ РЫСМАХАН.