фото: ҚР Ұлттық музей
«Цифрландыру ақпарат кеңістігінің ашықтығын арттырып, халыққа жедел әрі сапалы мәлімет жеткізуге мүмкіндік берері анық. Бұл әсіресе жалған ақпаратпен күресуде өте маңызды. Біз Big Data және жасанды интеллект негізінде ақпарат ағынын сүзгіден өткізіп, қоғамға сенімді ақпарат тарату жүйесін жетілдіруге тиіспіз», деп атап өтті Аида Балаева.
Министр сонымен қатар ұлттық құндылықтарды заманауи технологиялармен ұштастыра отырып, рухани мұраны кеңінен насихаттаудың маңызына тоқталды. Осыған байланысты архив, кітапхана және музей қорларын цифрлық форматқа көшіру жұмыстарын күшейту қажет екенін атап өтті.
Бұдан бөлек, Аида Балаеваның айтуынша, қазақтың ұлттық фольклорын интерактивті, анимациялық, инфографикалық және иллюстративті форматта жасау жоспарланған. Бұл мақсатқа жасанды интеллект технологиялары қолданылмақ.
«Биыл Қазақстан музейлерінің виртуалды желісі «E-museum» веб-порталын ашуды жоспарлап отырмыз. Әлемнің кез келген бұрышындағы пайдаланушылар мәдени мұраларымызды 3D модельдер арқылы тамашалау үшін көрнекі және интерактивті технологиялар енгізіледі», деді министр.
Алға қойылған жоспарлардың қатарында қазақстандық фильмдер, сериалдар мен анимациялық туындыларды қамтитын стриминг платформаны іске қосу бар.
Сонымен қатар, Ұлы Жеңістің 80 жылдығы аясында министрлік «Батырларға тағзым» атты онлайн-платформаны іске қоспақ. Бұл платформада екінші дүниежүзілік соғысқа қатысқан қазақстандықтар туралы мәліметтер ұсынылады.
