Сурет: intlaffairs.hku.hk
Шынында да, бүгінгі білім саласының көшбасшысына қандай құзырет қажет, сондай-ақ озық технологияны, жасанды интеллектіні және стратегиялық өзгерістерді басқаруды білім жүйесіне қалай енгізуге болады? Осы сұрақтарға «Білім берудегі өңірлік көшбасшылық: инновациялар және жасанды интеллект іс-әрекетте» атты кәсіби даму бағдарламасының сарапшылары жауап береді.
Оқыту курсы Қорқыт ата атындағы Қызылорда университеті мен Ә.Марғұлан атындағы Павлодар педагогикалық университетімен бірлесіп өткізіледі. Негізгі сессияларды Сеул ұлттық университетінің сарапшылары жүргізеді. Жаңа бағдарлама өңірлік білім бөлімі жетекшілерінің басқару және көшбасшылық дағдыларын дамытуға бағытталған. Оған 90-ға жуық облыстық, қалалық және аудандық білім бөлімдерінің басшылары, мектеп және колледж директорлары қатысады.
NU вице провосты, Жоғары білім мектебінің деканы Аида Сағынтаеваның айтуынша, бүгінде білім саласы дербестендіріліп, цифрлық және ықпалдастық арта түскен.
«Егер бұрын оқу үдерісі барлығына бірдей болса, қазір ол оқушының жеке қажеттілігіне бейімделген. Бір жағынан, цифрландыру классикалық мектептің аумағын кеңейтті. Қазір технология, ЖИ, онлайн платформалар оқытуды интерактивті және қолжетімді етіп отыр. Сондай-ақ менеджерлерге жасанды интеллектіні пайдалану тренд емес. Бұл – жаңа шындық», деген ол жасанды зерде арқылы алынған ақпаратты мұқият тексеріп, талдау қажеттігін еске салды.
Оқыту курсына арналған бағдарлама 10 модульден тұрады. Онда білім мен технология және менеджмент саласындағы жетекші сарапшыларды біріктіріп, қатысушыларға көшбасшылық дағдыларды жетілдіру, басқарудың инновациялық құралдарын меңгеру секілді ерекше мүмкіндіктер қарастырылған.
Жоғары білім мектебінің қауымдастырылған профессоры Мир Афзалдың сөзіне зер салсақ, қатысушылар курс барысында көшбасшылықтың жаңа тұжырымдамасымен танысады.
«Бұл әлемге күрт өзгеріс әкелген жасанды интеллект дәуірінде өте қажет. Жасанды интеллекті оқу бағдарламасына, оқытуға және мектепті басқаруға кіріктірілмей ешқандай білім саласы дамымайды. Сондықтан біз ұстанатын негізгі тұжырымдама: көшбасшылық қызмет емес, ол – тәжірибе», деді профессор.
Айта кетейік, бұл бағдарлама «Academic Leadership Institute: Executive Academic Leadership Programme» және «Deans’ School» сияқты табысты бастамалардың жалғасы. Бұған дейін осы бағдарлама шеңберінде отандық жоғары оқу орындарының 80 ректоры мен деканы біліктілігін жетілдірген. Жалпы алғанда, NU Жоғары білім мектебі құрылғаннан бері 27 мыңнан астам білім саласының қызметкері кәсіби даярлықтан өткен.
