Суреттерді «Visit Zhetysu» турстік ақпараттық орталығы ұсынды
Жалпы, құландар популяциясының көп бөлігі осы аймаққа тиесілі, 3 600-дей құлан Кербұлақ ауданының «Алтынемел» ұлттық табиғи паркінің аумағын мекен етеді. Туристер осы әсем жаратылысты көруге арнайы келеді. Өңір әкімінің баспасөз қызметінің мәліметінше, өткен жылы саябаққа 24 мыңнан аса адам табан тіреген, соның 7 мыңы – алыс-жақын шетелден келген қонақтар.
Саябақтың тағы бір табиғи тылсымы – Айғайқұм. 10-12 мың жыл бұрын пайда болған ұзындығы 3 км, биіктігі 150 метр құм жотасы саябақтың айрықша белгісі іспеттес, Жетісу өлкесінің табиғи кереметтерінің бірі.
«Мұнда келушілерге құландарды, қарақұйрықтарды, сәті келсе саябақтың басқа да ерекше жануарларын тамашалауға арналған фото, бейне сафари ұйымдастырылады. Мұның бәрі экологиялық туризмді дамытуға ықпал етеді, өйткені ұлттық парктер Жетісу облысындағы 5 туристік бағыттың бірі», дейді «Visit Zhetysu» туристік ақпараттық орталығының жетекшісі Жандос Нұриев.
Саябақ қызметшілерінің барлық тыныс-тіршілігі «Қызыл кітапқа» енген жануарларды, соның ішінде құландарды сақтап қалуға бағытталған. Біршама жыл бұрын мұнда Түрікменстаннан 30-ға жуық құлан әкелінген, қазір құландар саны едәуір көбейді. Мысалы, 2023 жылы саябақ аумағын 3 мыңға жуық құлан мекендесе, былтыр олардың саны 3 600-ге жетті. Бұл биологиялық түрдің бір бөлігі ұлттық парктен басқа аймақтарға да таралып жатыр.
«Жануарлар популяциясының көбеюіне, саябақтың дамуына, туристер санының артуына мемлекет тарапынан қолдау көрсетіліп келеді. Қауіпсіздікті жақсарту мақсатында 14 жаңа мотоцикл мен моторлы қайық, 10 трактор, қарда жүретін көліктер, дрон сатып алынды. Дронды түнде де ұшыруға болады. Жол инфрақұрылымын жақсартуда облыс әкімдігі тарапынан көрсетілетін қолдаудың маңызы зор. Өткізілетін имидждік іс-шаралар арқылы туристерді көптеп тарта бастадық. Мұның бәрі саябақтың дамуына, фауна мен флораның сақталуына оң әсерін тигізіп отыр», дейді «Алтынемел» мемлекеттік ұлттық табиғи паркінің бас директоры Қуат Байтұрбаев.
Ұлттық парктің жалпы аумағы 307 мың гектардан асады. Бірегей табиғатын, сирек кездесетін жануарларын, тарихи-мәдени мұра ескерткіштерін сақтау үшін «Алтынемел» ЮНЕСКО биосфералық резерватының халықаралық мәртебесін иеленген. Мұнда сирек кездесетін өсімдіктердің 31 түрі, Қазақстанның «Қызыл кітабына», халықаралық табиғатты қорғау одағының Қызыл тізіміне енгізілген жануарлардың 66 түрі кездеседі. Соның ішінде барыс, құлан, қарақұйрық, т.б. бар. Таулы жерлерге қоңыр аюдың келгені де байқалған. Ұлттық саябақ бірегей табиғи нысандарымен де танымал. Олардың қатарында Айғайқұм, Ақтау бор таулары, Қатутау шөлді лава таулары, 700 жылдық тал, Бесшатыр сақ қорғандары, Таңбалы тас петроглифтері бар. Туристер осы бірегей табиғи нысандарды да тамашалай алады.
«Қазір Қазақстан көркем табиғатының арқасында Үндістанда жақсы танымал. Біз Шымбұлақта, Көлсай, Қайыңды көлдерінің жағасында болдық, Енді «Алтынемел» ұлттық саябағы мен Айғайқұмның тамашасын көзбен көріп, зерттеп-біліп жатырмыз. Әсерімізді сөзбен айтып жеткізу мүмкін емес», дейді Үндістаннан келген турист Намбутасеха.
Былтыр жол инфрақұрылымын жақсарту мақсатында республикалық маңызы бар «Сарыөзек – Көктал» жолының ұзындығы 23 шақырым болатын Алтынемел асуындағы учаскесіне күрделі жөндеу жүргізілді.
«Мен мұнда алғаш рет 5 жыл бұрын отбасыммен бірге келгенмін. Соңғы келгенімде Айғайқұмның «әнін» ести алмай кеттім. Бірақ бұл жолы жолым болып, құмның дауысын естідім. Оның биігіне шыққандағы әсер мүлде бөлек. Мүлгіген тыныштық, зәу биіктен қарағандағы көрініс тіпті ғажап», дейді Алматыдан келген жас турист Рената Линник.
«Алтынемел» ұлттық саябағы сырттан келген қонақтарға таптырмас рухани олжа. Облыста экологиялық туризмнің дамуына да сеп. Саябақ басшылығы, облыс әкімдігі, «Visit Zhetysu» туристік ақпараттық орталығы бұл бағыттағы жұмыстарды жүйелі түрде жалғастыра беретін болады.
Жетісу облысы
