Жалпы, сары құрлықтың басты додасында Жапония құрамасының командалық есепте өзгелерге есе жіберген кездері сирек. Мәселен, сол кезден бері ұйымдастырылған 27 жарыстың 19-ында күн шығыс елі өкілдерінің асығы алшысынан түсті. Қытай қыздарының алты рет мерейі үстем болды. 2021 жылы коронавирустың кесірінен Алматыда жалауы желбіреген жарысқа аталған мемлекеттің бұрымдылары келмеді. Балуан Шолақ атындағы спорт сарайында өткен сол бәсекеде Үнді елі өкілдерінің бақ жұлдызы жанды.
Тұсаукесер Азия чемпионатында еліміздің құрамасы бір қолаға қол жеткізді. Ол жүлдені 57 кг салмақта белдескен Светлана Волкова иеленді. Аталған додада еліміз барлығы 86 жүлде олжалады. Оның 19-ы алтын, 16-сы күміс, 51-і қола. Жеңіс тұғырының ең биік сатысына көтерілгендер қатарында Светлана Ярошевич (2003), Жұлдыз Ешімова (2007), Елена Шалыгина (2009, 2012), Татьяна Аманжол (2009, 2013, 2014, 2020), Гүзәл Манюрова (2010, 2011, 2012, 2014), Жәмила Бақбергенова (2020, 2022, 2023), Валентина Исламова (2021), Елмира Сыздықова (2021, 2023), Мәдина Бақбергенова (2022) сынды сұлулар бар.
Жерлестеріміз үшін 2009, 2012, 2014, 2019, 2020, 2021, 2022, 2023 жылдар табысты болды. Сол жарыстарда Әнұранымыз екі реттен шырқалды. 2003, 2007, 2010, 2011, 2013 жылдары бір-бір алтыннан иелендік. Қалған бәсекелерде күміс пен қоланы қоржынға салғанымызбен, бас жүлдеге қол жеткізе алмадық.
Азия чемпионатында барлығы 11 командаға ғана бас жүлде бұйырған екен. Солардың арасындағы ең табыстылары – Жапония мен Қытай. Жапондар 102 алтын алса, қытайлықтар 57 рет топ жарды. Осы көрсеткіш жөнінде 19 алтыны бар еліміз үшінші орында. Басқа елдердің нәтижелері мынадай: Моңғолия мен Үндістан – 10, Қырғызстан – 8, Оңтүстік Корея мен Солтүстік Корея – 4, Түрікменстан мен Тайпей – 1.
2020–2023 жылдар аралығында Нью-Дели, Алматы, Ұланбатыр, Астанада өткен жарыстарда еліміздің әйелдер құрамасы екі алтыннан олжалап, жалпы есепте үздік үштіктің қатарынан көрінді. Жәмила Бақбергенова Азияның үш дүркін чемпион атанса, Елмира Сыздықоваға бұл белес екі рет бағынды. Татьяна Аманжол, Валентина Исламова, Мәдина Бақбергенованың бір мәрте мерейі үстем болды.
Былтыр Бішкекте шымылдығы түрілген бәсекеде бірде-бір бұрымдымыз алтын тұғырға көтеріле алмады. Алатаудың арғы бетіндегі айқасты төрт қоламен қорытындыладық. Жүлде иегерлері – Лаура Алмағамбетова, Диана Каюмова, Анастасия Панасович, Елмира Сыздықова. Енді қазақ қыздары Амманда өтетін Азия чемпионатында сол олқылықтың орнын толтырады деп үміттенеміз.
Әйелдер күресінен 2024 жылғы Азия чемпионатының жеңімпаздары: 50 кг – Юи Сусаки (Жапония), 53 кг – Ким Джиханг (Солтүстік Корея), 55 кг – Мо Кийока (Жапония), 57 кг – Фенг Йонсин (Қытай), 59 кг – Жанг Си (Қытай), 63 кг – Айсұлу Тыныбекова (Қырғызстан), 65 кг – Махиро Йоситаке (Жапония), 68 кг – Нонака Одзаки (Жапония), 72 кг – Джанг Сиан (Қытай), 76 кг – Айпері Медетқызы (Қырғызстан).
