Суретті түсірген – Жангелді ӘБДІҒАЛЫМ
«Daryn First Championship» республикалық роботтехникасы фестивалінде топ жарып, Орталық Азия чемпионатында өңіріміздің намысын қорғаған Қарағандыдағы «Мұрагер» мамандандырылған мектеп оқушылары үздік жобаларын таныстырды.
Фестивальға қатысушы өрендерді облыс әкімінің орынбасары Әлібек Әлденей құттықтап, сәттілік тіледі.
– Роболенд фестивалі небәрі 10 жылдың ішінде 30 команда, 70 адам қатысқан кішігірім сайыстан бүгінгі таңда халықаралық деңгейге жетті. Фестивальдың шығармашылық идеялар жарыққа шығатын үлкен алаңға айналғаны – Қарағанды өңірі үшін үлкен мәртебе. Сіздердің араларыңызда еліміздің цифрлық әлеуетін арттыратын білікті жастар бар екеніне сенімдімін. Бүгінгі сайыстар жаңа білім алып, ерекше пікір алмасуларға жетелейтін жақсы орта құруға зор мүмкіндік береді, – деді Әлібек Әлденей.
Бұған дейінгі өткен тоғыз фестивальға Италия, Сербия, Грекия, Польша, Грузия, Әзербайжан, Қырғызстан, Өзбекстан және елімізден жеті мыңға жуық команда қатысыпты. Жалпы, 12 мыңнан аса қатысушы өздерінің үздік жобаларын қорғаған.
Мұнымен қоса фестиваль жылда үш мыңнан астам көрермен жинап, жарыс онлайн трансляция арқылы да таратылған. Осылайша, он жыл ішінде фестиваль өз ауқымын кеңейтіп, халықаралық деңгейдегі тәжірибе алмасу алаңына айналып үлгерді.
Жарыстың деңгейі артқан сайын қатысушылар саны да көбейіп келеді. Биылғы фестивальға 362 командадан тұратын 750 қатысушы бақ сынады. Чемпионатта «Кегельринг», «Лабиринт», «Квадрокоптерлерді маневрлеу», «Шығармашылық санат» секілді белгілі бағыттар бар.
– «RoboLand» – еліміздегі білім роботтехникасы бойынша ең алғашқы ірі жоба әрі техникалық шығармашылық пен жаңа технологиялардың ауқымды форумына айналды. Бұл чемпионат – жас инженерлер мен конструкторлар үшін тәжірибе алмасу алаңы ғана емес, сонымен қатар білім беру роботтехникасының өзекті мәселелерін талқылауға арналған ашық диалогті платформа, – дейді фестивальдың бас төрешісі Есбол Әрінов.
Болгарияның Варна қаласынан келген Сергей Смынтынаның шәкірттері 9-13 жас аралығындағы балалар лабиринттері байқауына қатысты.
– Қазақстанда осындай ауқымды чемпионаттар өтіп жатқанын білмедік. Фестиваль жоғары деңгейде өтті. Мұндай халықаралық кездесуді өз көзімізбен көруге, тәжірибе жинауға, өзімізді көрсетуге келдік. Өйткені бізде қалыптасқан роботтехника және бағдарламалау мектебі бар, – деді Сергей Смынтына.
Ал Иран ұлттық командасының жетекшісі Надер Нобахт: «Роботтехниканы оқытудың жаңа жолдарын пайдаланудың маңыздылығы» тақырыбында баяндама жасадым. Жалпы, Иранда роботтехника жақсы жолға қойылған. Бұл біздің елдегі Тегеран университетімен тығыз байланысты. Мектептерімізде роботтехника пән ретінде оқылатындықтан үздік оқушыларымыз Малайзия, Қытай елдерінде өтетін жарыстарға жиі қатысады. Биылғы Қарағанды фестиваліне «Шығармашылық санат» бойынша қауіпсіздік жобасын ұсынатын 9 қатысушы келді. Әртүрлі робот түрлерін пайдаланып, өрттің алдын алуға бағытталған жобалар ұсындық», дейді.
Сонымен екі күн бойы өткен роботтехника чемпионатында Қарағанды облысы тағы да жоғары нәтиже көрсетті. Өңір командалары жалпыкомандалық есепте бірінші орынды иеленсе, Қостанай облысының өкілдері екінші орын, Өзбекстаннан келген қатысушылар үшінші орын алды.
Фестиваль аясында дәстүрлі «Қарағандылық кездесулер» өтті. Биылғы пікірталас «Білім беруді цифрлық трансформациялау: трендтер мен перспективалар» тақырыбы аясында өрбіді. Онда жетекші сарапшылар оқу жүйесіне цифрлық технологияларды енгізуді талқылап, STEM-білім беруді дамыту бойынша тәжірибе алмасты.
Жас өнертапқыштар чемпионаттан соң С.Сәпиев атындағы бокс орталығында өткен «RoboLand Party» ойын-сауық бағдарламасын ықыласпен тамашалады.
Фестивальды «Kazdidac» қауымдастығы ұйымдастырды. Бас демеуші – «Базистік дүкен» ЖШС, ресми демеушілер – DIGIS AV пен Регион 715 компаниялары.
Қарағанды облысы
