Елордалық депутаттар – ел газетінде қонақта

Еркін пікір алмасу фор­ма­тын­да­ғы басқосу­ды ашып, жүргізген серік­тес­тіктің бас директоры Дихан Қамзабекұлы елордалық мәслихат депутаттарының баспа­сөз­ге деген ықыласына, өзара ықпалдастықты жаңа деңгейге көтеруге бағытталған пейілдеріне алғыс айтып, кездесудің маңыз­дылығын атап өтті.

– Бәріміз мемлекеттік мүддеге қызмет етіп жүрміз. Жаңарған еліміздің, Әділетті Қазақстанның мүмкіндігінше қоғамға жақын болу, қоғамдық диалогті алға шығару сынды бүгінгі мақсат-мұраттарын жақсы түсінеміз. Сонымен қатар елімізде өзге
этнос өкілдері де өмір сүріп жатыр, түрлі қоғамдық-саяси жіктер де бар. Міне, осылардың арасында белгілі бір сұхбаттастықты кәсіби диалог деңгейіне жеткізу, сондай-ақ мәдени-ағартушылық, отбасы құндылықтары, жастар ісі сынды өзге де ақпараттық бағыттағы жұмыс­тарды күнделікті жүзе­ге асырып келеміз, – деп Д.Қамзабекұлы 300-ге жуық қыз­мет­кердің басын қосқан серіктес­тіктің 11 басылымының бағыт-бағдарын таныстырып шықты.

Өз кезегінде Астана қала­лық мәсли­хатының төрағасы Табиғат Зейнұлқабден еліміз­дің бас басылы­мы­ның ұжы­мы­мен кезде­сіп, жиынның рухани пікір алмасу бағытында ұйымдастырылғанына ризашы­лы­ғын білдірді.

– Еліміздің дамуы бағытын­да атқарып жатқан жұмыс­та­ры­мыздың ортақ тұс­тары көп. Мәселен, сіздер қоғамға қа­лам арқылы қызмет қылсаңыздар, біз де қоғамның үнін атқарушы билікке ісімізбен жеткізіп отырмыз. Алдағы уақытта мәслихат атқарған жұмыстарды сіздер арқылы халыққа үнемі жеткізіп отырсақ, үлкен шаруа атқарылар еді, – деген Т.Зейнұлқабден сонау бала күніндегі газетпен алғаш қалай танысқан оқиғасын әңгімелеп берді.

Ал кезінде елордалық «Астана ақша­мы» газетінде 13 жыл табан аудармай басшы­лық қызмет­терде болған, бүгінде «Egemen Qazaqstan» газеті бас редакторының орынбасары Талғат Батырхан мәслихат депу­татта­рының алдында газет мәртебесіне байланысты бір ұтымды ұсы­нысын ортаға салды.

– Бізді елорданың жауапты орындарының, мектептерінің «Егеменнен» бастап балалар газетіне мүлдем аз жазылуы толғандырады. Сауатты астанаға бәріміз де жауаптымыз. Иә, Астананың өзге қалалардан мәртебесі жоғары. Сол сияқты оның газетінің де мәртебесі елі­міз­дің өзге де қалалық газет­те­рі­нен бір бас жоғары тұруы керек. Қанша дегенмен ел­дің аста­­­на­сының шежіресін жа­сап жатқан басылым ғой, – деп Т.Батырхан астаналық мәслихат депутаттарының назарына «ақшамдықтардың» үлкен мәселесін жеткізді.

Одан кейін сөз алған депутат Кендебай Адамбек мәслихат депутаттарының да жұмысын жұртқа тұрақты жеткізіп отыратын әріптестік орнату идеясын тастады. Ол мәжілісмендер сияқты астаналық мәслихат депутат­тарының да батыл ұсы­ныс­тарын айтып, өзекті мәселені көтерген өткір сауалдар жолдап тұратынын тілге тиек етті.

Сондай-ақ жиында «Қазақ газет­тері» ЖШС бас директо­ры­ның бірінші орынбасары Виктор Пряников, «Egemen Qazaqstan» газетінің бас редакторы Ғабит Іскендерұлы, депутаттар Бауыржан Қасымбергебаев, Динара Байсеркина, Ғабит Тәжімұрат, Асқар Смағұлов, Бекзат Жолжақсынов, «Egemen.kz» сайты­­ның шығарушы редакторы Баян Сүлейменқызы да сөз сөйлеп, БАҚ өкіл­дері мен депутат­тардың байланысын арттыра түскен бастамаға жоғары баға берді.

Жиын соңында Дихан Қамзабекұлы Астана қалалық мәсли­ха­тының төра­ғасы Табиғат Зейнұлқабденге алғыс біл­діріп, ел газетінен естелік ретінде «Абай Құнанбайұлы: сипаттамалы библиографиялық көрсеткіш» көптом­дығының І, ІІ томдарын, «Егемен Қазақстан» кітапханасы» сериясымен жарық көрген Әбіш Кекілбаевтің «Дәуір дауысы», Тілекқабыл Боранғалиұлы­ның «Еңбекші қазақ» ән­дері» кітаптарын тар­ту етті.

Ал депутаттар редакцияның шығар­­ма­шылық, өндірістік бөлім­деріне кіріп, газет шығару үдерісінің қыр-сырына қанықты.