Бұл – салиқалы саясат жемісі

Кеше «Қазақстан жастары Кон­гресі» заңды тұлғалар бірлестігінің өкілдері 26 сәуірде өтетін Қазақстан Президентін кезектен тыс сайлауға байланысты өз ой-пайымдарымен бөлісіп, мәлімдеме жасады. Мәлім­демені бірлестіктің атқарушы директоры Айдын Сәбитов оқып берді. Онда былай делініпті: «Біз, «Қазақстан жастары Конгресінің» мүшелері, елдегі жастардың ең ірі бірлестігінің өкілдері Қазақстан Республикасының Президенті, Елбасы Нұрсұлтан Әбішұлы Назарбаевтың кандидатурасының ұсынылуын бірауыздан қолдаймыз. Тәуелсіздікке қол жеткеннен бергі жылдары еліміздің экономикасы өркендеп, халықтың әл-ауқаты жақсарып, мәдениетіміз жанданып, Қазақстан әлем алдында беделді елге айналды. Еліміздің осы күнге дейінгі қол жеткізген жетістіктері мен халықаралық аренадағы беделі Елбасымыздың салиқалы саясатының жемісі деп білеміз». Сондай-ақ, А.Сәбитов «Мем­лекет біздің санамызда ертеңгі күнге деген сенімділікті оятады. Мәселен, Елбасы баста­ма­сымен қолға алынған «2050-Стра­тегиясы» мен «Нұрлы Жол» Жаңа Экономикалық Саясаты Қазақ­станның жақын 5 жылдың ішінде ғаламдық геосаяси және экономикалық қиындықтарды еңсеруіне жол ашатын болады. Ол үшін біздің елімізде барлық жағдай қарастырылған. Яғни, Қазақстан жастарының жоғары білім алып, жақсы жұмысқа орналасуларына, әлемнің жетекші оқу орындарында дәріс алып, өздерінің кәсіби біліктіліктерін арттыруларына да мүмкіндіктер беріл­ген», – деді. Осылай дей ке­ле, ол бұл ойды барша қазақ жас­та­рының қолдайтынына сенім білдірді. Ләйла ЕДІЛҚЫЗЫ, «Егемен Қазақстан». АСТАНА.