Фариза ОҢҒАРСЫНОВА: Тәуелсіздік жайлы тасқын жыр
Көрнекті ақын Несіпбек Айтұлының “Ерлікке ескерткіш” атты поэмалар жинағы туралы толғаныс
“Туғанда дүние есігін ашады өлең, өлеңмен жер қойнына кірер денең” деп ұлы Абай ақын айтқандай, ақыны ғана емес, жалпы қазақ халқы негізінде о бастан өлеңмен, жырмен ауызданған, жаңа туған сәбидің жанын, тәнін бесік жырымен тербетіп, ұлтының ұранын да, намысы мен сыр-әнін де әженің әлдиі арқылы ұланының бойына сіңірген.
Қазақ әдебиетінің тарихында оқырманының жан-дүниесін тебіренткен Сұлтанмахмұт Торайғыровтың поэмаларынан кейін Сәбит Мұқановтың “Сұлушашы”, Исаның “Ақбөпесі”, Жұбан Молдағалиевтің “Кек”, “Сел”, Хамит Ерғалиевтің “Біздің ауылдың қызы”, “Құрманғазы” дастандарынан соң Серік Тұрғынбеков, Серік Ақсұңқарұлы секілді кейбір ақындар ғана жыр-дастан жанрына қалам тартты.
Дей тұрғанмен, еліміз Тәуелсіздік туын көтергелі бері азаттық айдынының бұрын ешқайсымыз жұтып көрмеген жұпар ауасынан тұншыққандай, ата-бабамыз ғасырлар бойы аңсаған осы тарихи арманның төңірегінде жарытып жақсы дүниелер жаза алмай жүрміз. Әрине, бұл жағдай тірліктегі қатпар-қатпар қарбалас факторларға: қоғамдық құбылыстың өзгеруіне байланысты адам психологиясы мен дүниетанымы да ә дегеннен бір қалыпқа түспейтіні, еліміздің өз отауын әлем кеңістігінде өз өрнегімен орналастыру жолындағы қиындықтар – осылардың бәрі теңіз бетіндей толқыған ақын көңіліне түрліше әсер етуінен болса керек.
Осы тұрғыда көсіле қалам тартып, Тәуелсіз мемлекетіміздің бүгіні, бүгінге жетуді арман еткен, сол жолда бастарын бәйгеге тігіп, жандары құрбан болған бабаларымыз туралы һәм еліміздің бостандық жолындағы тарихи өмірбаянын қуатты жырмен толғап жүрген қазақтың көрнекті ақыны – Несіпбек Айтұлы.
Американың Азаттық, Францияның Эйфель мұнарасындай әлемге таныс ескерткіштер секілді Тәуелсіз мемлекетіміздің символына айналған Бәйтерек туралы поэмасын азат елдің алғашқы жыр-бәйтерегі деп қабылдағаным есімде. Ақын одан соң да қаламын құрғатпастан екі поэма жазып, “Ерлікке ескерткіш” деген атпен “Фолиант” баспасынан шығарыпты.
Сонау сексенінші жылдары менің өлеңдерімде “Отаным менің – Қазақстан”, “Қазақ жері – бесігім” деген жолдарды “Отан біреу – ол Совет одағы” деген қағидаларды айтып алып тастаған редакторлар бұл күнде үлкен ақынбыз десіп жүр. Әрине, олар сол кездегі саясаттың орындаушылары еді.
Несіпбек ақынның “Ту” поэмасы – қазақ әдебиетінің тарихындағы жалау туралы жазылған тұңғыш үлкен шығарма. Рас, қазақта “жалаулатып” немесе коммунистік идеологияның ескерткішіндей “қызыл тулар желбіреп” дегендей талай өлеңге “көрік” берген тіркестер болды. Алайда, тудың елдіктің белгісі екендігін оқырманға әбден жеткізе білген және бүгінгі тәуелсіздігіміздің көк туы өзінен өзі тігіле салмағанын:
Кеудесін атқан оққа төсеп өлген,
Алаштың туы қайда кеше көрген?
Жарқырап тәуелсіздік таңы атпаса,
Өктемдік бізге қашан есе берген?!-
деп, бүгінгі еркіндіктің қадірін біреу біліп, біреу білмей жүргенде, қалың оқырманның жанына сіңіре жырлайды.
Жауыздың ешбірі жоқ жаза көрген,
Қашанда қиянаттан қазақ өлген!
Көк тудың қасиетті киесі атар,
Сабынан ұстамасақ таза қолмен!
Қандай тауып айтылған сөз! Мемлекеттік тудың сабын таза қолмен ұстау деген ой қазақ өлеңінің тарихында бұрын- соңды айтылып көрген емес. Ақынның мемлекеттік айбынымыз – туды аялай білуді қазақы болмысымызға сай, осыншалықты ашық та айқын сезіммен жеткізе білуі Несіпбек ақынды басқалардан даралай түссе керек.
Ақынның “Ерлікке ескерткіш” кітабындағы екінші поэма – “Ақмола шайқасы”.
Бұл күнде көркем үйлері көз тартып, қазақ даласының төрінде бой көтерген еліміздің бас қаласы Астана шетелдік келімсектердің қолжаулығы болып, бір-бірімен жауласқан “биліктің ық жағында ін күзетіп” жерін де, елін де сататындар бүгінгі өмірде де табылып қалуы мүмкін деген ақын ойын сөз арасынан аңғаруға болады.
Аттылы жасауылдар жүз қаралы,
Көз салып көкжиекке сызданады.
Қазақтың құдай берген байтақ жерін
өзінен сол қазақтың қызғанады.
Бірі біріне қақпан құрып, жар астында жүрген бауырын жау көріп, басы бірікпеген қазақ сол дерттің салдарынан әлі күнге арылмай келеді.
Иттер де ырылдасқан бір-бірімен,
Бірігіп ұмтылмай ма бөрі көрсе, –
деген пікірді бүгінгілерге ой салу үшін де айтып отыр ақын. Қолында билік барларға қай заманда да бәрі оңай, олар ойлыға озбырлық та жасай алады, ойсызды төрге шығарып, жуасты жүндей түтуге де әзір. Ұлттың тұтастығы болмаса, ұлттық намыс та шалажансар, ал намыссыз ұрпақтың басы бірікпейді. Осы ойлар ақын жүрегін шымырлатып шыққан жырмен өрілген.
Несіпбек ақынға “біздің ауылдың мысығы да – арыстан, ана ауылдың арыстаны да – мысық” деген жазылмаса да өмір сүріп келе жатқан, көп замандастарымыздың көкірегін кернеп жүрген қағида жат. Ата-бабаларымыздың қандай жауға да жұдырықтай жұмылып, іргесін ыдыратпай қарсы тұрғаны кітаптың өн бойынан бой көрсетеді. Оған мысал – “Ту” дастанындағы:
Жүйріктің бауыры жазық, қолтығы кең,
Шапқанда шаң боратар серпінімен,
Табын мен жағалбайлы жігіттерін
Бөкенбай бастап келді жер түбінен, – деген шумақтар.
Телефоны, поштасы жоқ замандарда қазақтың атқа мінген азаматтары батыстан шығысқа, түстіктен арқаға аттанып, ауызбірлік пен намыс біріктірген тұтастықтың арқасында талай алпауыт елдер күні бүгінге дейін көз салып жүрген байтақ жерімізді сақтап қалған.
Ақын Несіпбек Айтұлының “Ерлікке ескерткіш” кітабынан ойлы оқырман нені түйеді дейтін болсақ, біріншіден тілі көркем, “баласы да, данасы да” деген секілді жалаң ұйқастардан аулақ, төгіліп жатқан жыр-тасқын.
Қазіргі балабақшалардың, бастауыш кластардың ұландарынан қандай батырларды білесің деп сұрасаң, Шварцнеггер, Жан Клод Ван Дамм, Брюс Ли дейді. Бұл біздің бабаларымыздың қайсарлық, қайраткерлікпен өткен жолынан, олардың елін, жерін қорғаған көзсіз батырлығынан хабарсыз екенімізді көрсетеді. Өзімізді өзіміз тануға келгенде әлі енжар тартып, қолдағы алтынның қадірін білмей жүргеніміздің ертең бармағымызды тістететін айғағы екенін түсінбей жүргеніміздің белгісі.
“Ұлттың өмірбаянын қайта- қайта өзгертіп жаздырып, алфавитін ауыстыру арқылы сол ұлтты тарихтан сүртіп тастауға болады” деген бір ақылгөй халықтың қағидасы бар. Ендеше, сол қағидатты естен әсте шығаруға тиісті емеспіз. Осы орайда Несіпбек ақынның аталған поэмаларын оқып, ұрпақтар өткеніне көз салып, көңіл аударады. Өз тарихын білмейтін, ата-бабасының ерлігін мақтан ете алмаған ұлт даланың тамырсыз қаңбағы секілді жоғалып, біреудің сайында, екінші біреудің ығында кетеді де, ұрпағы сондай ұлт ретінде жер бетінен сүртіледі. Мұндайда елдік рухты паш еткен жырлар ғана ұлттық намысты атой салып оятады. Бұл жырлар ұрпақтарды бүгінгі тәуелсіздігімізді қадірлеп-қастерлеуге баулиды. Олай болса, Несіпбек шығармашылығы осы жәйттерден бүгін сақтануға, ұрпақ санасын төл арнасына түсіп, тәуелсіз еліміздің келешегін қалыптастыруға жол сілтейді.
Жығылмас ешқашан да елі жарға,
Алдында ту ұстайтын Ері барда!
Маған осы екі жол өлең бейнетпен күн кешкен қазақ деген ұлттың тарихын бояумен өрнектейтін суретшінің үлкен бір шығармасына мазмұн болатындай көрінеді.
Кең байтақ еліміздің қай қиырын алмаңыз қасіреті мен қасиетінен хабар берерлік аңыз бен ақиқаты атауларынан-ақ көзге ұрады. Соның бірі – Шығыс Қазақстан аймағындағы Күршім деген аудан. Ол жер – біздің талай атақты ұл-қыздарымыз шыққан қасиетті өлке.
Жүрегі қазақ көрсе дүрсілдеген,
Қалмақ жоқ ол күндерде күрсінбеген,
Жасады көп қарсылық арпалысып,
Батыры күжірейген Күршім деген.
Ел болып, көшіміз түзелген уақытта қазақпен өмір бойы күресіп өткен қалмақ Күршімнің есімін әлі сақтап келе жатқанымыз қалай деген ой туындайды. Осы орайда ақын жазған шығармалар негізінде ұрпақ “Күршім” сөзінің қайдан шыққанын білумен бірге, даламызда әлі қыры мен сыры ашылмаған, ертеңін ойлаған елге ой салатын тұстарымыздың бар екендігін айтады, ойлануға шақырады.
Мемлекеттік сыйлыққа ұсынылып отырған “Ерлікке ескерткіш” кітабы әбден лайық шығарма деген пікірдемін. Әлем картасында жарық жұлдыздай жарқ етіп, жастығымен де, жасампаздығымен де бүкіл дүниені таңдандырған Астана шынында да ата-бабаларымыздың ерлік рухына қойылған ескерткіш секілді.
Талай замандар бойына өмірден шындық, әділеттілік таппай жүректері мұздаған, жаны сыздаған халқымызға мейірім шуағын шашқан Тәуелсіз еліміздің мерейі биік, ұрпағының, халқының талғамы мен түсінігі терең болғай!