Индустрияландыру ісі ұлттық идея деңгейіне көтерілмек

Премьер-Министр Кәрім Мәсімовтің төрағалығымен селекторлық кеңес түрінде өткен кешегі Үкімет отырысында Елбасының тікелей тапсырмасымен қолға алынған елімізді индустрияландыру ісіне барынша маңыз беру, оны ұлттық идея деңгейіне көтеру туралы келелі әңгіме болды. Осы мәселе жөніндегі ағымдағы істің барысы туралы баяндама жасаған Индустрия және жаңа технологиялар вице-министрі Берік Камалиевтің айтуы бойынша, биылғы жылға жалпы құны 840 миллиард теңгені құрайтын 144 жобаны жүзеге асырудың жоспары жасалған болатын. Осының негізінде елімізде 20 мыңнан астам жаңа жұмыс орны құрылуы тиіс. Үстіміздегі жылдың бірінші жартысында 131 миллиард теңгенің 72 инвестициялық жобасы жүзеге асқаны белгілі. Бұл 12 мыңнан астам тұрақты жұмыс орнын құруға мүм­кіндік берді. Енді екінші жарты­жыл­дықта 559 миллиард теңгенің 72 жо­басы жүзеге асуға тиіс болатын. Оның 4-уі қазірдің өзінде іске қосылған. Өмірдің әрдайым өзгеріске бейім тұратындығы белгілі. Сол секілді белгіленген жобаларды іске қосуда аздаған өзгерістер бар секілді. Мәсе­лен, Индустрия және жаңа техно­ло­гиялар министрлігінің әр ай сайын жергілікті атқару органдарымен бірлесіп өткізетін мәжілістерінде 12 жобаны іске қосу мерзімінің келесі жылға ауысты­рылуы мүмкін екендігі байқалып отыр. Оның есесіне Пре­зидент Әкімшілігінің мемлекеттік инс­пекторларымен өңірлерге барып, жағдаймен танысып, мәселелерді талқылау барысында еліміздің ин­дустриялық картасына қосымша 83 жобаны қосу мүмкіндігі анық­тал­ған. Бұл жобалардың 27-сін биыл аяқтаудың толық мүмкіндіктері бар.  Міне, осындай өзгерістерді есепке алатын болсақ, үстіміздегі жылдың екінші жартысында жиыны 80 жоба іске қосылмақ. Сонымен өмір өзгерістердің өзі инвестициялық жобаларды белгілеп, оларды іске асыру мерзімін айқындаған тұста  ел экономикасында оң өзгерістер бар екендігін көрсетіп отыр. Үкімет басшысы Кәрім Мәсі­мов жүзеге асырылатын индус­трия­­лық жобалардың мәселесін талқы­лай келе бұл іске неғұрлым тере­ңі­рек әрі кеңірек ауқым бе­рілетін­дігін атап көрсетті. Оның айтуын­ша, бұдан былайғы уа­қытта елімізді индус­трия­ландыру ісі ұлттық идея дең­гейіне көте­рі­луі тиіс. Үкімет бас­шысының осы сөзін мұнан кейін сөз ке­зе­гін алған Премьер-Ми­нистр­дің орынбасары – Ин­дус­трия және жаңа технологиялар ми­нистрі Әсет Исекешовтің жа­са­ған баян­дамасы толығымен қуат­тап шық­ты. Ендігі кезекте біздің елі­міз­дегі басты назар нақ осы мәсе­леге аударылмақ. Орта­лық және жер­гілікті мемлекеттік орган­дардың бірінші басшы­ла­ры­ның жұмы­сы нақ осы идея­ның жүзеге асы­рылуымен бағала­натын бола­ды. Елімізге инвести­ция тарту ісіне барынша пәрмен беріледі. Осыған орай Премьер-Ми­нистр Кәрім Мәсімов тиісті ор­гандардың алдына бірқатар жаңа тапсырмалар берді. Алдын-ала есептеулерге қара­ғанда, еліміздің шикізаттық емес секторына таяу­дағы 4 жылдың ішінде 30 мил­лиард доллардың инвестициясын тарту мүмкіндігі бар екен. Осы мүм­кіндікті жүзеге асыру үшін әкім­дер өңірлерге ин­вестиция тар­тудың барлық мүмкіндік­терін қарастыратын болады. Соны­мен қатар индустрияландыру кар­та­сына енгізілген жобаларды жү­зе­ге асырушы кәсіпкерлерді тек­се­ру­ге мораторий жариялау жөнін­де Ел­басы қарауына ұсыныс енгізілетін болды. Осыған орай Әділет ми­нистрлігіне қойылған мәселені жүзеге асырудың жол­дарын қарас­тыру тапсырылды. Облыс және қала әкімдеріне 2 аптаның ішінде өздері мін­детіне алған жобалардың жағ­дайын сол жерге бара отырып қайта бір тек­серу жүктелді. Со­ны­мен қатар Үкі­мет басшысы үдемелі индустрия­лық-иннова­ция­лық дамудың мем­ле­кеттік бағдарламасын одан әрі жүзеге асы­руға қатысты бірқатар тап­сыр­малар берді. Әрбір облыс әкімі мен мемлекеттік органның басшысына өздері басқаратын ба­ғыттар бойынша 2 айдың ішін­де ғылыми-инновациялық даму­дың мүмкіндіктері мен тетіктерін анық­тау тапсырылды. Сонымен қатар 10 күннің ішінде индус­трия­ландыруды басқару орта­лығын құру туралы қау­лының жобасын әзірлеу міндет­телді. Отырыста Байланыс және ақ­парат министрі Асқар Жұмаға­лиев сөз алып, индустрия­лан­дыру ісін, оның маңызын халық­қа жеткізу жөнінде әзірленіп жатқан шаралар  жөнінде айтып берді. Министр елімізде жасалған әрбір өнімге, ұсақ тауарлардан бас­тап құрас­ты­ры­латын автокө­лік­тер, түрлі тех­никаларға дейін “Қазақстанда жа­салған” деген белгіні қоюды, соны­мен қатар бір күнді Индустрия­лан­дыру күні деп атауды ұсынды. Ми­нистр­дің пікірінше, әрбір қазақ­стандық елі­мізде жүзеге асыры­лып жатқан үдемелі индус­триялық-ин­нова­циялық даму бағдар­ламасының нәтижелері­мен жақ­сы таныс болуы керек. Осыған орай ми­нистрлік өз тарапынан бірқатар жаңа шаралар әзірлеу үстінде. Осы отырыста сонымен қатар қысқа әзірлік мәселесі қаралды. Аталған мәселе жөнінде хабар­лама жасаған Индустрия және жаңа технологиялар вице-ми­нистрі Д.Тұр­ғановтың айтуынша, жалпы дай­ындық барысы жаман емес. Дегенмен, кейбір жерлерде мазут жет­кізу ісінің өткен жыл­мен салыс­тырғанда, төмен екен­дінгі байқалды. Аталған екі мәселе жөнінде интерактивті байланыс арқылы бар­лық облыс басшылары сөз алып, өздеріндегі жағдайды айтып берді. Сұңғат ӘЛІПБАЙ.