• 23 Қаңтар, 2016

«Бірлік» партиясы үшін – бірінші сайлау

332 рет

көрсетілді

2 мин

оқу үшін

Egemen Qazaqstan

Кеше Астана қаласындағы «Қазмедиа» орталығында «Бірлік» саяси партиясының төрағасы Серік Сұлтанғали алдағы Парламент сайлауына байланысты БАҚ өкілдеріне сұхбат берді. Ол Елбасының Парламент Мәжілісі депутаттарының кезектен тыс сайлауын өткізу туралы Жарлығын қолдайтынын айтып, аталған саяси науқанға партия мүшелерінің үміткер ретінде қатысатынын жеткізді. «Елбасының бұл Жарлығын «Бірлік» партиясы толық қолдайды. Мұндай шешім тактикалық тұрғыда өте дұрыс. Себебі, Мәжілістің бесінші шақырылымы өзіне жүктелген міндетті толығымен орындады. Жолдауда айтылған бағдарламалардың заңдық негізін қалап, аз уақытта ауқымды жұмыс жасады. Алайда, қазір әлем тап болып отырған қиындық, экономикалық дағдарыстар жаңа күшті, жаңа қарқынды, жаңа екпінді қажет етеді. Сондықтан, сайлау өткізіп, Парламент құрамына қажыр-қайраты мол, іскер, тың идеялары бар азаматтардың келуіне мүмкіндік беру – ең ұтымды шешім. Бұл ретте біздің партия үшін де бұл сайлау үлкен мәртебе екенін айтқым келеді. Себебі, құрылғанына толық екі жыл болған партиямыз алғаш рет сайлауға қатысып, өз бағын сынап көреді», – деді С.Сұлтанғали. Сонымен қатар, ол «Бірлік» партиясының мүмкіндігіне тоқталып өтті. Екі жылдың ішінде бірқатар игі істерге мұрындық болған партия үшін қазір өз күш-қуатын бағамдайтын шақ туғанын айтқан С.Сұлтанғали: «Әзірге қазақстандықтар үшін аса таныла қойған жоқпыз. Соған қарамастан, екі жылда өз деңгейімізде айтарлықтай жұмыс жасадық. Сайлауда заң жүзіндегі ең аз дауыс үлесімізді алсақ та қанағаттанамыз. Сондықтан, алдағы сайлау «Бірлік» партиясы үшін үлкен емтихан болмақ», – деді. Сондай-ақ, төраға ақпан айында партияның съезі өтетінін мәлімдеді. «Сайлауға байланысты ақпанда съезд өткіземіз. Сол жерде депутаттыққа үміткерлер тізімі жасалып, бағдарламамыз дайындалады. Үгіт-насихат кезінде Қазақстанды аралап, стратегиямызды, жоспарымызды халыққа жеткіземіз. Осы жұмыстардан кейін партия мүшелерінің саны артады деп үміттенемін. Негізінен ауыл өмірін жақсартуға бағытталған ұстанымымыз халық тарапынан қолдау табарына сенемін», – деді партия төрағасы. Айта кетейік, қазіргі таңда «Бірлік» партиясының 53 мың мүшесі бар. Еламан ҚОҢЫР, «Егемен Қазақстан».