Экспо-2017 – технологияларымыз үшін үлкен мүмкіндік

Қазақстанның Польшадағы Төтенше және өкілетті елшісі Ерік Өтембаев осы елдің Қоршаған орта министрі Ян Шишкомен кездесу өткізіп, екі ел арасындағы ынтымақтастықты нығайту мүмкіндіктерін талқылады. Кездесуде баламалы энергетика қорларын дамыту, климаттық саясат, инвестициялар тарту, заманауи экологиялық құралдарды өндіру, «жасыл» технологиялар, сондай-ақ, бірлескен ғылыми зерттеулер өткізу салаларында айтарлықтай әлеует бар екені аталып өтті. Я.Шишко 2017 жылы Астанада өтетін «Болашақтың энергиясы» тақырыбындағы халықаралық ма­ман­дандырылған көрменің аса маңызды жоба екеніне екпін түсірді. Өйткені, көрменің бүгінгі Поль­шаның технологиялық шешімдерін көрсету, екі тараптың ғылыми және бизнес топтарына қызықты алдыңғы қатарлы жобаларды насихаттауға мол мүмкіндік туғызатынын айтты. Оның пайымдауынша, ЭКСПО Қазақстан мен Польша арасындағы ынтымақтастықты жандандыруға оң ықпал ететін болады. Сондай-ақ, кездесуде өңірлік экологиялық жобаларды жүзеге асыру мен Қазақстанның «жасыл» технологияларды дамыту тетіктерін құруды қамтитын «Жасыл кө­пір» бастамасы шеңберіндегі ынты­мақтастықтың келешегі де талқы­ланды. Министр топырақтың тозуы, жерлердің шөлге айналуы, Арал теңізін, орманды алқаптарды қайта қалпына келтіру және эко­жүйе­лерді дамыту мәселелеріне қатысты қазақстандық жобаларға қызығушылық танытты. Польшаның осы тақылеттес қиындықтарды шешуде үлкен тәжірибесі бар. Табиғат қорғау ведомствосын басқаруға үшінші мәрте тағайындалған (1997-1999 жылдары, 2005-2007 жылдары және 2015 жылдан қазірге дейін) Я.Шишконың айтуынша, бұл бағытта Польша үкіметі соңғы он жыл ішінде айтарлықтай жүйелі шараларды іске асырды. Нә­тижесінде, бүгінгі күні Қоршаған ор­таны қорғаудың ұлттық қоры, Су шаруашылығы басқармасы және Қоршаған ортаны қорғау бан­кі сияқты институттармен ықпал­дастықты қамтамасыз ететін жүйе құрылды. Бұл ұйымдардың қызметі экологиялық жобаларға инженерлік көмек көрсету мен қаржыландыруды ұйымдастыруға бағытталған. Өз кезегінде, бұл «жасыл» инвестицияларды тартып, «жасыл» технологиялар орталықтарын, зерттеу стансалары мен лабораторияларын қарқынды дамытуды ынталан­дырады. Сондықтан, қор мен банктің тәжірибесін Қазақстан Респуб­ликасының «жасыл» экономикаға көшу тұжырымдамасын іске асыруда қолдануға болады. «Екіжақты ынтымақтастықтың келешегі зор бағыттарында ықпал­дастықты арттырудың маңызы зор. Ал қор мен банктің тәжірибесі «жасыл» инвестицияларды тартуда мемлекеттік және өңірлік деңгей­лерде ескерілетін болады. Серік­тестікті кеңейту мақсатында бүгінде жобасы әзірленіп жатқан тиісті екіжақты халықаралық келісімге қол қойылады», – деп қорытты өзінің сөзін Е.Өтембаев. «Егемен-ақпарат».