Кадр тәрбиесіне құқықтық база дайын

Мемлекет басшысы айқындаған Бес институттық реформа «100 нақты қадам» Ұлт Жоспарындағы «Заманауи мемлекеттік аппаратты қалыптастыру» ісі енді толықтай әзірленген құқық қорғау органдарының кадр саясаты тұжырымдамасы ережелерімен сәйкес келетіндігін Бас прокуратураның кадр жұмысы департаментінің аға прокуроры Ғабит Әбдіхалықов брифинг барысында ерекше атап өтті. Кәсіби құрамды қалыптастыру бойынша келелі міндеттерге жетуге бағытталған кадрлық процес­терге жаңа заңдар мен бірқатар жаңа тетіктер енгізілгендігімен бөліскен Ғ.Әбдіхалықов осы қабылданған «Мемлекеттік қызмет туралы» Заңға сәйкес құ­қық қорғау органдары мем­ле­кеттік қызметтің бірыңғай жүйе­сіне енгізілгендігін алға тарт­ты. «Қызметке кіру төменгі тұр­ған лауазымнан басталады. Ол үшін біліктілік талаптары бел­гіленген, бұл құжаттар барлық шарттарда нақты реттелген. Бірінші кезекте, барлық кадрлық процестерді ғы­лымға негізделген әдістермен жос­парлау мен болжау іске асырылады», деді аға прокурор. Оның айтуынша, кадрларға қажет­тілікті қанағаттандыру үшін маман­дықтардың тізбесіне қарай қызмет­керлерге деген қажеттілік жоспар­ланатын болады. Кадрлық бол­жамды жүргізу Әдістемесі де әзірленген. Аталған құжат ал­дын ала қызметкерлерге деген қа­жеттілікті жоспарлауға бағыт­талып отыр. Сонымен, прокуратура орган­дарында кадрлық резерв: ат­тестат­тау нәтижесі  және қызмет тиім­ділігін бағалау бойынша қалыптасады. Резервте тұрғандар үшін ведомстволық мәліметтер қоры құрылады. Қордағы бос тұрған басшы лауазымдар  және оған орналасу үшін кандидатқа қо­йы­латын талаптар туралы нақты мәліметтер көрсетілмек. Әсі­­ресе, меритократия қағидасы бо­йын­ша бәсекеге қабілеттілік көр­сет­кішін еңгізу ерекше мәнге ие. Бұл орайда қолайлы мораль­дық-психологиялық ахуалды жасау мақсатында және жұмыстың сапасын арттыру үшін тұрақты түрде әлеуметтік мониторинг жүр­гізу институты енгізілген. Өзге құқық қорғау органдары­на қа­рағанда, прокуратурада  қыз­метке кірудің сынақ мер­зімі бір жылға дейін деп бел­гілен­ген. «Тек сосын ғана жас қыз­меткер аттестаттаудан өтіп, бі­рін­ші сыныптық шенді беруге ұсынылады. Алғаш рет жұ­мыс стандарты енгізілетін болады, бұл стандарттар барлық жұ­мыс­тағы процестерді реттейді және қызметкердің жұмысының нәти­желері нақты өлшенетін болады», деп атап кетті аға прокурор. Оның пайымынша, бұл мем­лекеттік органдардың стра­те­гия­лық жоспарларын орындау­ды қамтамасыз ету, нәтижеге қа­рай еңбекақы төлеу жүйесіне кө­шу критерийлерінің бірі болып табылады. «Бұл мәселеде біз алға қарай қадам жасап отырмыз. Аталған заңды іске асыру үшін 2016 жылғы 16 наурыз­да қол қойылған Президент Жар­лы­ғының жобасын әзірледік. Бұл құжатта құқық қорғау орган­дарының қызметкерлерін бағалау, лауазымы бойынша разрядтар беру және жауаптылықты қалып­тастыру тәртібі айқын­далған», деп атап өтті кадр жұмысы департаментінің аға прокуроры. Асқар ТҰРАПБАЙҰЛЫ, «Егемен Қазақстан».