Тіс емдеудің тың тәсілі

– жас ғалымның жаһандық жаңалығы Ұлыбритания және Солтүстік Ирландия Біріккен Корольдігінде «Болашақ» бағдарламасы бойынша оқып келген жас маман Бауыржан Айтуов басқаратын InnoDent компаниясы медицина саласында бұрын-соңды болмаған препарат ойлап тапты.  Жаңа жабдықтың аты – InnoDent. Ол әлемнің АҚШ, Израиль, Ресей, Қытай мен Жапония сияқты медицинасы жақсы дамыған мемлекеттерінде де жоқ. Біз сөз етіп отырған InnoDent дәрісі кариесті емдеуге арналған. Дәрі тісті бастапқы кездегі қал­­пына келтіреді. Бауыржан Ай­туовтың айтуынша, InnoDent кариесті ерте сатысында емдеу үшін пайдаланылады, тез әрі ауырт­пай емдейді. Бүгінде елімізде кариестің Кеңес Одағынан қалған медици­налық тәсіл бойынша емделіп жатқаны белгілі. Оның кең та­ралған тәсілі – пломба орна­ту. Біздің емханаларымызда дә­рігерлер жаңа сапалы плом­ба­лық материалдарды пайдаланады. Соңғы кездері кариесті ауыртпай емдейтін қазіргі за­манғы стоматологиялық құрал-жабдықтар қолданылады. Қазір, жасыратыны жоқ, адамдардың барлығы кариесті емдеу үшін осы тәсілге жүгінеді. Адамдар тісті тазалап, пломба жасатып алуға үйренген. Оны өзіміз де жасататынымыз жасырын емес. Ал Бауыржан Айтуовтың ұсынып отырған тәсілі мүлдем басқаша. Оның айтуынша, кариесті пломба жасатып емдеу уақытша нәрсе. – Пломба сапасына қарай бір­неше жыл ғана тұрады. Сондықтан осы күнге дейін кариесті пломба жасатып толық емдеу мүмкін болмай тұр. Ал біздің ойлап шығарған препаратымыз бұзылған эмальді қайта қалпына келтіру жолын ұсына алады. InnoDent дәрісі эмаль­дің табиғи өсіп-жетілуіне ықпал етеді. Соның нәтижесінде, химиялық препараттар мен акрилді материалдарды пайдаланбай-ақ кариестің кесірінен бұзылған эмальді жаңадан қалпына кел­тіріп, өсіріп шығаруға болады. Емдеу ұзақтығы – 15 минут.  Ем ауыртпай жасалады. Жаңа эмаль бір айда өсіп шығады. Ол үшін жаңа препараттың бір тамшысы жетіп жатыр. Тың технология кариесті хирургиялық әдіссіз емдеп шығуға жаңа мүмкіндік береді. Мұны тіс емдеу саласындағы соны жаңалық десе болады, – дейді ол. Бауыржан Айтуов бұл жоба­ны бірінші жылы «Даму» бағ­дарламасы бойынша жүзеге асыр­ған. Сосын Астанада екі жыл жұ­мыс істепті. Аталмыш жобаны ғы­лыми ғана емес, сондай-ақ, биз­нес­тік жоба десе де болады. Мұны ол өзі де жасырмайды. Осы жобаны бизнеске айналдыру үшін алдымен бизнес-жоспар, оның жолдары болу керек дейді. Оның айтуынша, қазір Қазақстан мен Ресейде InnoDent препара­тына қызығып жатқан екі-үш компания бар. «Қазір біз­дің жұмысымызға, жобамызға қызығушылық танытып жатқан компаниялар табылды. Солар арқылы дәрілерді стоматологияларға жет­кізуге ты­­­рысамыз. Дегенмен, біздің не­­­гізгі мақсатымыз ақша тауып, пайда көру емес. Дәл қа­зір біз дәрігерлерге жаңа дәріні қолдануды үйретіп, тәжірибе бөлісуді мақсат етіп отырмыз. Содан кейін ғана көтерме сауда арқылы нарыққа шығамыз. Ол үшін біз алдымен ғылыми патент алуымыз керек. Қазір елі­мізде дәрінің патенті бар. Енді Ресей мен Қытайда патент алсақ, шетелдердің нарығына шыға аламыз. Әсіресе, бізді Қытай қатты қызықтырып отыр. Өйткені, ол үлкен нарық», – дейді ол. Дастан КЕНЖАЛИН, «Егемен Қазақстан»