Қазақстан 2026-2027 жылдары жеті әлем чемпионатын өткізеді
<p><strong>Қазақстан 2026-2027 жылдары жеті әлем чемпионатын өткізу құқығына ие болды. Бұл туралы Туризм және спорт министрлігі мәлімдеді, деп хабарлайды <a href="/" target="_blank" rel="noopener noreferrer">Egemen.kz</a>.</strong></p>
Биыл елімізде күрес түрлерінен әлем чемпионаты өтсе, 2027 жылы Астана қаласы олимпиадалық және олимпиадалық емес спорт түрлері бойынша алты бірдей әлем чемпионатын қабылдайды.
Атап айтқанда, 2027 жылы шорт-тректен жасөспірімдер арасындағы әлем чемпионаты 28-31 қаңтар аралығында өтеді. Одан кейін 10-26 сәуір күндері бокстан, 22-30 мамырда үстел теннисінен, 7-14 маусымда дзюдодан және 7-13 шілдеде таеквондодан әлем чемпионаты ұйымдастырылады. Ал киберспорттан әлем чемпионатының нақты мерзімі алдағы уақытта жарияланбақ.
«Тәуелсіз Қазақстан тарихында алғаш рет еліміз екі жыл ішінде жеті әлем чемпионатын өткізу құқығына ие болды. Бұл – Қазақстанның спорт инфрақұрылымы мен ұйымдастырушы әлеуетінің жоғары деңгейде екенін айғақтайтын маңызды жетістік. Сонымен қатар бұл әлемдік спорт қауымдастығы алдындағы зор жауапкершілікті де білдіреді», делінген Туризм және спорт министрлігінің хабарламасында.
Тарихи сәт: Александр Винокуровтың спорттық киімі Халықаралық Олимпиада музейіне табысталды
Еске сала кетейік, 29 шілде мен 9 тамыз күндері аралығында елордада «Болашақ ойындары-2026» халықаралық турнирі өтеді. 8 шілде күні «Qazaqstan» жеңіл атлетикалық спорт кешенінде турнирдің Аккредиттеу орталығы ашылады.