Мемлекеттік қызмет істері жөніндегі облыстық департамент шенеуніктердің бұрын істі болған адамды қызметке қабылдаған іс-әрекетіне өз бағасын берді.
Құрылымның әдеп жөніндегі отырысында М.Жұмабаев ауданының әкімі Асқар Бегмановтың жемқорлықтың алдын алу, мемлекеттік қызметшілердің тәртібін нығайту бағытында атқарылып жатқан шаралар жайлы хабарламасы тыңдалып, олқылықтарды жою міндеттелді. Екі жыл ішінде ауданда лауазымды тұлғалар тарапынан 427 заң бұзушылықтың тіркелгені белгілі болды.
Солардың бірі – облыстық мәдениет басқармасының бұрынғы басшысы Талғат Ақылбековтің сыбайлас жемқорлыққа жол беріп, абақтыда отырғанына қарамастан, халық шығармашылығы орталығының жетекшісі болып орналасуы. Мұндай бармақ басты, көз қысты әрекет газетте лауазымдық қызметке тағайындау туралы конкурс жарияланғаннан кейін жүргізілген тексеріс барысында әшкереленген. Осылайша сот шешімімен «Мемлекеттік қызмет туралы» Заң талаптарын өрескел бұрмалаған аудандық мәдениет және тілдерді дамыту бөлімінің меңгерушісі Тамара Грибоваға 100 айлық есептік көрсеткіш көлемінде айыппұл салынған.
Талқылау барысында оның заңға қайшы әрекеттері мойнына қойылып, бетіне басылды.
Бақыт РАМАЗАН,
журналист
Солтүстік Қазақстан облысы