Қытайдың төрт аймағын жаяу аралап шықты
Қытайда тұратын төрт жасар Пань Веньвень есімді қыз елдің төрт аймағында болып үлгерді. Ол өз әке-шешесімен бірге бұл жерлердің бәрін жаяу аралап шыққан.
Паньдар отбасы елдің оңтүстік-шығысында орналасқан Цзяньси провинциясындағы Шанжао қаласында тұрады. Ерлі-зайыпты екеу 2013 жылы қастарына бір жасқа жаңа толған қыздарын алып, ұзақ уақыттық сапарға шығады. Олар үш жылдың ішінде Юньнань, Гуйчжоу, Сычуань провинциялары мен Гуанси автономиялы ауданында болған. Енді шілде айында Тибетке дейін жетіп алуды жоспарлап отыр.
Ұзақ жолдың басында кішкентай Веньвень жаяу жүре алмаған екен. Сосын әке-шешесі оны көтеріп алып жүрген. Алайда, кейінірек қыз біраз қатайып, өзі жүре алатын дәрежеге жеткен. Қазір ол күніне 30 шақырымға дейінгі аралықты жаяу жүріп өте алады.
Қыздың әкесі Пань Шифен бұл тәжірибе қыздарының тәуелсіз болып өсуіне, әртүрлі жағдайларға өз бетінше бейімделуіне зор ықпал жасайтынын айтады. Оның ойынша, туризмнің арқасында бүлдіршін достық рәуішті және елгезек болып өсіп келеді.
Мұрат АЙТҚОЖА