[caption id="attachment_52783" align="aligncenter" width="560"] prokuror.gov.kz[/caption]
Бірінші жарты жылдықтың қорытындыларына арналған Бас прокуратура алқасының жиналысында Жақып Асанов Түрме индексі бойынша Қазақстанның позициясы жыл сайын жақсарып келе жатқанын айтты, деп хабарлады Бас прокуратураның баспасөз қызметі.
«Түрме индексі бойынша жағдайымыз жыл сайын жақсаруда. Бүгінде біз 221 елдің арасында 62-ші орнындамыз. Бұл – Еуропаның жетекші елдерінің деңгейі. Жарты жылда сотталғандар саны 2,5 мыңға төмендеген. Қаражалдағы колония жабылды. Осы жылы тағы алтауы жабылатын болады», – деді Ж. Асанов.
Бас Прокурор бұл «Түрме халқын азайту бойынша 10 шара» деген жобаның жемісі екенін атап өтті.
«Азаптаулар шешілмеген мәселе болып қалып отыр. Жыл сайын 600 шағымды тіркейміз, әрбір алтыншысы расталады. Соңғы 1,5 жылда азаптаудан колонияларда 4 адам қайтыс болды. Сондықтан «Азаптаусыз мемлекет» деген жобаға бастама жасадық. Жағдайды түзеу бойынша шаралар бар», – деді ол.
Айдар ӨРІСБАЕВ