Қала көшелерінде – жаңа автобустар

Қызылорда автобус паркі тағы да жаңа 40 қоғамдық көлік алды. Келесі айда тағы 42-сі келеді. Осылайша, қаладағы халық көп қатынайтын маршруттардың авто­бустары түгелдей жаңармақ. Барлық автобустар газбен жүреді, GPS, бейнебақылау каме­ра­лары мен мүмкіндігі шек­теу­лі азаматтар үшін мініп-түсу­ге арналған аппарельмен жабдық­талған. Олар 78 жолаушыға дейін тасымалдай алады. Көлік жүр­гізушілері мен кондукторлар арна­йы дайындықтан өткен. Жаңа ав­то­бус­тардың іске қосылуы­мен 160 адам тұрақты жұмысқа орналасты. Қазір арнайы белгіленген ай­мақта сыйымдылығы 200 авто­бусқа арналған автобус паркі­нің құрылысы жүргізілуде. Авто­бус паркінде көлік жөндеу, жуу цехы мен GPS арқылы барлық авто­бустардың бағытын бақылап оты­ратын орталық болады. Облыс әкімі Қырымбек Көшербаев тұрғындарды жаңа авто­бустардың іске қосылуымен құттықтады. – Көптеген жылдар бойы халық­­ты әбігерге салған осы қоғам­­дық көлік мәселесін шешу мақ­сатын­да біз 2014 жылы «Байқ­оңыр» әлеу­меттік кәсіп­керлік корпо­ра­­ция­сы жанынан Қызылорда авто­бус паркін құрып, Еуропа қай­та құру және даму банкімен бір­ле­сіп жұмыс жасадық. Соның нәти­же­сін­де банк 21 миллион АҚШ дол­лары көлемінде несие берді. Бүгін қызыл­ордалықтар үшін айрық­ша күн, салтанатты сәт. Қала ха­л­қы­ның көптен күткен қуаны­шы орын­далып, су жаңа үлкен сыйым­ды­лық­тағы заманауи автобустар ел игіл­і­гіне пайдалану­ға беріліп отыр, – деді облыс әкімі. Шараға Еуропа қайта құру және даму банкінің Қазақстан бойын­ша директоры Джанет Хэк­ман арнайы келіп қатысып, авто­бус жүр­гізу­шілеріне кілттерді табыстады. Ал бұған дейін елге қызмет еткен автобустар қаланың шет аймақтарынан жолаушы тасымал­дайтын болды. Ержан БАЙТІЛЕС, «Егемен Қазақстан» ҚЫЗЫЛОРДА