Астанадағы EXPO халықаралық көрме орталығы алаңында «Қазақстан – ортақ үйіміз» тақырыбында ауқымды музыкалық флешмоб өтті, деп хабарлайды Egemen.kz.
Іс-шараға қала мектептерінен шамамен 2000 оқушы қатысып, бәрі бір уақытта күйші-композитор Қаршыға Ахмедияровтың «Алтын ұя» күйін орындады.
Оқушылар домбыра, қобыз, қылқобыз, жетіген, сазсырнай, флейта және скрипка секілді ұлттық әрі классикалық аспаптарда өнер көрсетті. Қатысушылардың жасы 10 мен 16 жас аралығында болды.
Ұйымдастырушылардың айтуынша, шараның басты мақсаты – музыка арқылы ел бірлігін көрсету. Түрлі аспаптардың үні бір арнаға тоғысып, көпұлтты Қазақстанның татулығын бейнеледі.
Оқушылар бұл күйді орындау кезінде туған жерге деген сүйіспеншілікті сезінгендерін айтты. «Алтын ұя» күйі Отанға деген сағыныш пен туған өлкеге құрметті білдіретін шығарма.