«Жерде бір жетім қуанса, көкте мың періште шаттанады» дегенді мың құбылтып айтып жүрсек те, мәні – біреу. Бүлдіршіндерді қуантып қана қоймай, түрлі қауіп-қатерден сақтандырып отыру да өзекті мәселе болып табылады. Айтпай келетін жаудың бірі – өрт.
Осы мәселеге орай, Алматы қаласының Төтенше жағдайлар департаментінің қызметкерлері Теміртау қаласынан келген балалар мен жасөспірімдер театрымен бірлесіп, қаладағы №1 Балалар үйінде «Пілдің баласы – өрт сөндіруші» спектаклін қойып берді.
Осылайша бір оқпен екі қоянды атқан қызықты шара Алматыға алғаш гастрольдік сапармен келген Теміртау театрының қойылымдарымен үйлесе кетті. Өйткені, бұл күндері Алматыда өрт қауіпсіздігі айлығы өтіп жатқан болатын.
Балаларға өрт қауіпсіздігі ережелерін бұзып, өртей жаздаған «Оттық» деген қыз туралы қойылым шынында да ұнады. Көмекке пілдің баласы – өрт сөндіруші мен инспектор асыға келіп, екеуі алапаттың алдын алады.
Көңілді, ойын түрінде өткен көрініс балаларға кәдімгідей қуаныш сыйлап, Теміртау балалар мен жасөспірімдер театрының актерлері рөлдеріне беріле ойнап, бүлдіршіндерді қуантты.
Балалар да қойылымға әсерлене араласып, ертегі кейіпкерлерін қолдап, оларға жандары ашып, өртпен ойнағанның түбі не болатынын, өрт пайда болғанда не істеу керектігін ұғынып отырды.
Көріністер аяқталған соң спектакльге көңілі толған балалар да теміртаулық өнер таланттарына алғыс білдірді.
– Қалай десек те, әрі қызықты әрі пайдалы өткен шараның мәні мол болды. Бүлдіршіндерді жалықтырмаған қойылым олардың рухани және мәдени дамуына мүмкіндік туғызатын, өмірге қауіп төніп, өрт туындағанында саналы әрекет етуді үйрететін, әртүрлі жағдайларда қарапайым қимыл дағдыларын меңгеруге көмектесетін педагогикалық идея іске асырылды, – дейді Алматы қаласының Төтенше жағдайлар департаментінің қызметкері А.Нүсіпбаев.
Азаматтық қорғау майорының айтуынша, мұнан былайғы жерде балалар үйінің тәрбиеленушілеріне келіп тұру алматылық құтқарушылар үшін дәстүрге айналмақ.
Айнаш ЕСАЛИ,
«Егемен Қазақстан»
АЛМАТЫ