Көкшетаудың «Тәуелсіздік» алаңы мен орталық универмаг алаңында дәстүрлі күзгі жәрмеңке ашылды. Оның жұмысына Бурабай, Зеренді, Сандықтау, Шортанды аудандары мен Аршалы ауданындағы «Ижевский» өндірістік кооперативі, Ақкөл ауданындағы «Үш бұлақ», Еңбекшілдер ауданындағы «ҚазГерҚұс», Целиноград ауданындағы «CapitalProjectLtd» жауапкершілігі шектеулі серіктестіктерінің ауыл шаруашылығы тауар өндірушілері қатысты.
Қала тұрғындарын Ақмола облысының әкімі Сергей Кулагин құттықтап, ел-жұртқа дастарқан байлығын тіледі.
Облыстық ауыл шаруашылығы басқармасының мәліметі бойынша, жәрмеңкеде 114 миллион теңгенің 57 түрлі жергілікті азық-түлік тауары қолжетімді бағамен сатылған. Сауда алаңдарына 66 тонна ет және шұжық өнімдері, 13 тонна балық, 250 мың данадан астам жұмыртқа, 21 мың тонна сүт пен сүт өнімдері, 22 тонна ұн, 80 тонна картоп 73 тонна көкөніс, 10 тоннаға жуық жарма, 5 тонна қант пен 10 мың литр өсімдік майы жеткізілді.
Мерекелік сипаттағы жәрмеңкеде аудан көркемөнерпаздарының концерттері қойылып, мәдени-көпшілік шаралар ұйымдастырылды.
Бақберген АМАЛБЕК,
«Егемен Қазақстан»
Ақмола облысы