Нұрсай – республикамыздың ең шалғайда орналасқан ауылдарының бірі. Бұдан үш-төрт жыл бұрын журналистік іссапармен осы ауылға жолымыз түскен еді. Сол кезде нұрсайлықтардың ауыз судан үлкен қиындық көріп жүргендеріне, олар оны жырақтағы Лекер көлі маңынан тасып ішіп отырғанына куә болғанбыз. Екіншіден, сонау жетпісінші жылдары салынған орта мектеп ғимаратына сол уақыттан бері күрделі жөндеу жүргізілмеген екен. Күздің ызғырық күндері мен ұйытқи соққан қысқы борандарда ғимарат ішін кеулеген жел мұндағы оқушыларды дірдектетіп қоя беретіні жөніндегі әңгімелерді де құлағымыз шалған-ды.
Әрине, содан соң газетімізге Нұрсай ауылының қос түйткілі жөнінде сын мақала жазылған болатын. Әйтсе де сол кезде бұған өңірдегі атқарушы билік жетекшілерінің бір де бірі селт етпегеніне қайран қалғанбыз. Дегенмен, игіліктің ерте кеші жоқ дегендей, таяуда осы ауылда ауыз сумен қамту жүйесі пайдалануға беріліп, мектеп ғимаратына күрделі жөндеу жүргізілгені үлкен қуаныш сезімін туғызады. Жіліктеп айтар болсақ, «Ақбұлақ» мемлекеттік бағдарламасы бойынша жүзеге асқан жобаға 247 миллион теңге қаражат бөлінген. Ал мектептің күрделі жөндеуіне 162 миллион теңге жұмсалған.
Ауыз су жүйесін тартуға есептелген мердігерлік жұмыстар о баста 11 айға есептелсе, оны өңірдегі құрылыс саласы тарландарының бірі Каримолла Жақыпов басқаратын «ҚұрылысГаз» ЖШС-нің құрылысшылары небәрі үш айдан астам уақыт ішінде сапалы түрде аяқтап шыққаны тағы бір мерей. Бұл ретте аталмыш нысанның жедел іске қосылуына Батыс Қазақстан облысының әкімі Алтай Көлгіновтің тікелей шапағаты тигенін айтпай кетсек шындыққа қиянат.
Гәп мынада. Нұрсай ауылындағы сумен қамту жүйесін аяқтауға аудандық бюджеттен бөлінген қаражат тапшылық жасаған екен. Осы жайтқа Казталов ауданына сапары барысында куә болған өңір басшысы шұғыл шешім қабылдап, облыстық бюджеттен тағы да қосымша 182 миилион теңге бөлдіруге ықпал жасапты. Күні бүгін ауылдағы 136 үйдің 126-сы ауыз су жүйесіне қосылып үлгерген. Қазір бұл істі толықтай аяқтау жұмыстары да мәреге таялып келеді.
Міне, кешегі бір күндері шалғайдағы Нұрсай ауылы тұрғындарының төбелерін көкке жеткізген қос қуаныштың сыры осындай.
Темір ҚҰСАЙЫН,
«Егемен Қазақстан»
Батыс Қазақстан облысы
Казталов ауданы
Нұрсай ауылы