Қайтарымсыз көмек көрсетіледі

Кеше Қазақстан Республикасы Қорғаныс министрлігінде Шанхай ынтымақтастық ұйымының құрылғанына 10 жыл толуы қарсаңында осы ұйымға мүше мемлекеттер қорғаныс министр­лерінің мәжілісі өтті. ҚР Қорғаныс министрі Әділ­бек Жақсыбековтің төрағалық етуімен өткен мәжілісте Қытай Халық Республикасының Ұлттық қорғаныс министрі Лян Гуанле, Қырғыз Республикасының Қорға­ныс министрі Әбиболла Құдай­бердиев, Ресей Федер­ациясы Қор­ғаныс министрінің орынбасары Анатолий Антонов, Тәжікстан Рес­­публикасының Қорғаныс министрі Шерали Хайруллоев пен Өзбекстан Республикасы Қорға­ныс министрінің халықара­лық бай­­ла­ныс жөніндегі орынбасары Рустам Ниязов қатысты. Мәжілісте ШЫҰ-ға мүше мем­лекеттер қорғаныс ведомстволары ынтымақтастығының даму барысы, халықаралық және өңірлік қауіпсіз­дікке байланысты мәселелер қарал­ды. Сонымен бірге онда өңірді тұ­рақ­сыздандыруға бағытталған кез кел­ген іс-қимылға қарсы тұра ала­тын сенімді механизмді құрудың ма­­ңызды әрі ол көп жоспарлы мі­н­дет­тердің бірі болып саналатынына, бұл бағыттағы негізі сүйеніш жауын­герлік дайындықтың деңгейін көтеру мен әскери білімді жетілдіру екендігіне баса мән берілді. Осы мәселеге байланысты ҚР Қорғаныс министрі Қазақстан ШЫҰ-ға мүше мемлекет­тер­дің әртүрлі салаларда қауіпсізді­гі­нің қамтамасыз етілуіне, тұрақ­ты­лығы мен өзара іс-қимылына назар аударатынын атап өтті. Ал жиынға қатысқан басқа елдер министрлері болса, ШЫҰ-ға мүше мемлекет­тер­дің ынтымақтастығы зор әлеуетке ие, ол өңірлік және халықаралық қауіпсіздікті тиімді түрде іске асы­ру­ға, сонымен бірге қорғаныс сала­сын реформалауда өзара іс-қимыл танытуға, әскери кадрларды әзір­ле­у­ге ерекше ықпал ететінін айт­ты. Мә­жілісте тағы да әскери са­ла­дағы сенім шарасы мен тұрақ­ты­лықты кү­шейту, өңірдегі қауіп­сіз­дік пен бей­бітшілікті нығайту, лаңкестікке қар­сы күресті жетілдіру мәселесі кө­те­рілді. Жиын соңында ШЫҰ-ға мү­ше мемлекеттер қорғаныс ми­нистр­лері­нің 2012-2013 жылдарға ар­нал­ған ынтымақтастық жоспары бекітілді. Ал кеше және арғы күні Қор­ға­ныс министрі Ә.Жақсыбеков ҚХР Ұлттық қорғаныс министрі Лян Гуанлемен және қырғыз­стан­дық әріп­те­сі Әбиболла Құ­дай­бер­диевпен өткізген кездесуінде ШЫҰ аясын­да­ғы екі жақты ын­ты­мақтас­тық мә­селелерін талқыла­ды. Қытай министрімен кездесуде қор­ғаныс ведомство­сының бас­шы­сы еліміз­дің ШЫҰ аясында ҚХР-мен ын­ты­мақтас­тық­қа ба­рын­ша маңыз беретінін, соның шең­берінде тұрақ­ты түрде лаңкес­тік­ке қарсы бірлескен әскери жат­ты­ғу­лардың, халық­ара­лық және өңір­лік саясаттың өзекті мәселелері бо­йын­ша ақпарат алмасу мен кеңесу­лер­дің өткізіліп жат­қа­нын тілге тиек етті. Ал Қытай Қорғаныс министрі былтыр Мәті­бұ­лақ полигон­ын­да өт­кен «Бейбіт миссия – 2010» жатты­ғу­ларын жо­ғары бағалайты­нын, осы жатты­ғу­лар ШЫҰ қару­лы күштері­нің бірігіп кез келген қауіпке той­тарыс бере алатынын көрсеткенін айтты. Сонымен бірге ол Қытайдың ШЫҰ аясында бар­лық мемлекеттермен терезесі тең саясат жүр­гі­зе­тін өзара сыйлас­тық пен ынты­мақ­тас­тықты ны­ғай­тудағы ұстанымын білдірді. Ал Қырғызстан Қорғаныс министрімен өткен кездесуде тараптар «Қа­зақ­стан Республикасы Үк­іметі мен Қырғыз Республикасы Үкі­ме­ті ара­сын­дағы қайтарымсыз әс­ке­ри көмек көрсету туралы келісімге» қол қой­ды. Осы жерде ҰҚШҰ мү­ше мемлекеттерге әскери мамандар даярлау жөніндегі келісім аяс­ында осыған дейін 70-ке тарта қырғыз әскери қызметшілерінің қай­тарым­сыз негізде Қазақстан Рес­пуб­ли­ка­сы Қор­ға­ныс ми­нистр­лігінің жоо-ла­рын­да білім алғанын, ал қазір көрші елдің 110 әскери қыз­мет­шісінің елі­міздің әскери оқу орын­дарында білім алып жатқанын атап өткен жөн. Дастан КЕНЖАЛИН.