Қар қалашығында елордаға тап болғандай әсерге бөленесіз
Тауық жылында айыртаулық бүлдіршіндер ерекше қуанышқа бөленді. Орталық алаңда композициялық құрылымы ерекше көз тартатын қар қалашығы пайда болып, оның бой көтеруіне қырыққа жуық мекеме-кәсіпорын атсалысты.
Бүгінгі күні ел символына айналған Астананы жергілікті жерде «тұрғызу» жөніндегі аудандық әкімдіктің идеясын жастар, мектеп оқушылары секілді еріктілер де қолдап, көмектерін берді. Сөйтіп, жұртшылық демалып, серуендейтін жерде көз жауын алатын 20-дан астам нысан орнатылды. Олардың ішінен ұзындығы үш метрге дейін жететін Ақорда ерекше көрінеді. Сол сияқты Бәйтерек, Бейбітшілік сарайы, Алтын адам мүсіндері де айнытпай салынып, хас шеберлердің қолынан шыққанын айғақтайды. ЭКСПО-2017 халықаралық көрмесі, Қарасай және Ағынтай батырлардың мемориалдық кесенесі де бейнеленген.
Қар қалашығынан жылдың басты нышаны – Тауықты, Аяз ата мен Ақшақарды, сондай-ақ, ертегілер кейіпкерлерін де кездестіруге болады.
Осылайша, билік орнындағылар өскелең ұрпақ бойына елордамыз жайлы танымдық мағлұмат берудің және де бойларында отаншылдық сезімін нығайтудың өзгеше тәсілін ойлап тапқан.
Өмір ЕСҚАЛИ,
«Егемен Қазақстан»
Солтүстік Қазақстан облысы,
Айыртау ауданы