Президенттікке кандидат, «Табиғат» экологиялық одағының төрағасы Мэлс Елеусізовті бұл күндері бір жерден ұстау қиын. Соңғы күндерде ғана ол бірде еліміздің қиыр оңтүстігінде болса, келесі күні қиыр шығысында болып, одан Астана асып, өзінің тұрақты мекені Алматыға Наурыз мерекесі күндері ғана келгенмен, мұнда да талай жұрт күтіп тұрғандықтан, үйінде бір сәт кідіре алмайды.
Ол жолдан келгеннен кейін бірден мүгедектердің түрлі қоғамдық бірлестіктерінің өкілдерімен кездесті. Бәрінің де ұсыныс-пікірлерін тыңдады. Олар әлеуметтік және құқықтық қорғауға мұқтаж. Оларға өз мүмкіндігіне орай жұмыс керек. Мемлекет тарапынан берілетін көмек қажетті өтей бермейді. Ал сол мүгедектердің, мүмкіндіктері шектеулі адамдардың арасында қабілеті жоғары адамдар көп. Тіпті, «Болашақ» бағдарламасын бітіргендер де бар екен. Тек олардың мүмкіндіктерін жан-жақты ескере отырып, жағдай жасау ғана керек. Президенттіктен үміткердің пікірінше, бұл үшін ең алдымен мүгедектердің құқықтары жан-жақты ескерілген заң қабылдаған жөн. Алдағы уақытта бұл заңды әзірлеу өзінің назарында болатынын айтты.
Еліміздің бас экологы қашан да журналистер қауымына жақын жүреді. Ресейлік журналистер онымен кездесуді қалаған екен, Мэлс Хамзаұлы оларды аттап кете алмай, сол күні араларына барды.
Қазақстан мен Ресейдің арасында ортақ мәселе көп. Тіпті кейде байлықтары да ортақ болып жатады. Журналистермен әңгімеде Каспий теңізінің экологиясы кеңірек сөз болды.
Елеусізовтің аты аталғанда, жұрттың көңілінде ағаш егу жүреді. Сірә, қандай қызмет атқармасын, Мэлс Хамзаұлы бұл қасиетті шаруаны ұмыт қалдырмайды. Өзінің туған күні 20 наурызда ол Боралдай қорғандары ұлттық паркіне өзінің жолдас-таныстарымен барып, 120 түп ағаш отырғызды. Бұл істі ол Өскемен және Астана қалаларында да жалғастырды.
Наурыз мерекесінің алғашқы күні жиналғандарды «Табиғат» экологиялық одағының тікелей атқаратын жұмысымен таныстырды. Мұнда қоғамдық конструкторлық бюро жұмыс істейді екен. Онда небір алтын қолды өнертапқыштар бас қосқан. Соның бірі Сергей Старков жер сілкінісі кезінде пайдаланылатын қорап жасап шығарыпты. Оған екі үлкен адам және бір бала паналай алады екен. Оған кіріп үлгерген адам қираған үйдің астында қалса да, аман қалады.
Кімге де болса, туған жердің орны бөлек. Мэлс Елеусізов Наурыз мерекесінің екінші күні өзінің туған ауылы Балқаш ауданындағы Бақанас кентінде болды. Президенттікке кандидат жерлестері атына жылы-жылы сөздер айтса, олар да өз кезегінде қошемет сөздерін аяған жоқ. Мерекеге арналған киіз үйдің төріне отырғызып, көпшіліктің назарында жүрген азаматқа құрмет көрсетті.
Әскерилерге де Мэлс Елеусізовтің айрықша ықыласы бар. Кезінде өзі де әскери қызметті өтеген, олардың жағдайын жақсы біледі. Әсіресе, офицерлер қауымының пәтерден қиындық көріп жүргенін үнемі естиді. Кеше сол әскерилердің өкілдерімен кездескенде, олардың мұқтажын жүрегімен сезінгендей болды.
Алматы қаласының Ақбұлақ дейтін аумағында бұрын Қорғаныс министрлігіне қараған 4 гектардай жер бар екен. Сол жерден еліміздегі пәтерсіз жүрген 7740 офицерге арнап көп қабатты үй салсақ деген ұсынысқа қолдау көрсете отырып, президенттіктен үміткер бұл мәселені оң шешу жөнінде қазіргі Президент Нұрсұлтан Назарбаевқа қарата өтініш те білдірді.
Бас экологтың бұл күндері уақыты қат.
Мамадияр ЖАҚЫП.