Иран Ислам Республикасынан келген бір топ делегация оңтүстікке ат басын бұрмас бұрын аймақтың ахуалын зерттеп, есеп-қисап жүргізгені анық. Өйткені, табыс табуға бағытталған капиталды құятын әрбір инвестордың бірінші кезекте өңірдің іскерлік және инвестициялық ахуалы мен жасалатын жеңілдіктерге мән беретіні мәлім. Бұл орайда, Оңтүстік Қазақстан облысында шағын және орта бизнесті дамыту мақсатында мемлекет тарапынан түрлі тиімді жеңілдіктер қарастырылып, инвесторларға қолайлы жағдайлар жасалуда. Әкімшілік кедергілер де мейлінше азайтылып отыр.
Сонымен қатар, Елбасы Н.Назарбаевтың ауыл шаруашылығын әртараптандырып, 2021 жылға қарай азық-түлік тауары экспортын 40%-ға көбейту жөніндегі тапсырмасы инвестиция тарту бағытындағы жұмыстарды жандандыра түсуге міндеттейді. «Қазақстанның агроөнеркәсіп кешенінің болашағы зор. Көптеген позициялар бойынша біз әлемде ірі аграрлық экспорттық өнім өндірушілердің бірі бола аламыз. Бұл, әсіресе, экологиялық таза тағамдарға қатысты. «Made in Kazakhstan» бренді сондай өнімдердің эталоны болуға тиіс», деді Н.Назарбаев «Қазақстанның үшінші жаңғыруы: жаһандық бәсекеге қабілеттілік» атты Жолдауында. Өңірдің инвестициялық ахуалы, экологиялық таза ауылшаруашылық өнімдері көңілінен шыққан Иран Ислам Республикасы Ауыл шаруашылығы министрінің кеңесшісі Мирлоги Сейедалиакбар Агареза облыс әкімі Жансейіт Түймебаевпен кездесуінде екі ел үшін де тиімді болатын жобаларды жүзеге асыруға ниетті екенін жеткізді. Сондай-ақ, кездесу барысында тараптар бірлескен кәсіпорындар құру, технологияларды жетілдіру, ауыл шаруашылығы салаларын дамыту жайын сөз етті. Бірлескен кәсіпорынның алғашқысы ашылып та үлгерді.
Иранда жылдық етке қажеттілік 2 млн 400 тоннаны құрайды екен. Бұл орайда оңтүстіктен күніне 60 тоннадан астам экологиялық таза ет экспортталмақ. Оны күні кеше Сайрам ауданында ирандық инвесторлардың қатысуымен ашылған ірі көлемде ет және ет өнімдерін дайындайтын жаңа комбинат жүзеге асыратын болады. Мұнда тәулігіне 3000 ұсақ мал мен 200 ірі қара сойылып, әзірленеді. «Қайып ата» ЖШС-нің еншілес қожалығы болып табылатын «ЮКО-ЭКО-FOOD» ет комбинаты бұл жобаны Иран мемлекетімен бірлесе бастап отыр. Жаңа ет комбинатының ашылу салтанатына облыс әкімі мен Иран Ислам Республикасының Ауыл шаруашылығы министрінің кеңесшісі бастап келген делегация қатысты. Көлемі 15 гектар болатын ет комбинатының 2000 шаршы метрден астам аумағы өндірістік құрылымға негізделген. Германиялық технологиямен жабдықталған кәсіпорын толық қуаттылығына шаққанда 5 мың ұсақ мал еті өндіріліп, жергілікті 350 адамды жұмыспен қамтамасыз етпек. Жобаның инвестициялық құнының 75 пайызын ирандық инвесторлар салған.
Ғалымжан ЕЛШІБАЙ, «Егемен Қазақстан»
Оңтүстік Қазақстан облысы