Қаңтар айында елімізде 1 046 жол-көлік оқиғасы тіркеліп, онда 1 480 адам зардап шекті, оның ішінде 81 адам қаза тапты. Бұл туралы ҚР Бас прокуратурасы Құқықтық статистика және арнайы есепке алу жөніндегі комитететінің мәліметінде айтылған.
Қаңтар айында Қазақстан Республикасының Әкімшілік құқық бұзушылық туралы кодексінің 610-бабы бойынша 1 548 адам жауапкершілікке тартылып, оның 1416-сына 31,6 млн. теңге мөлшерінде айыппұл салынған.
Сонымен қатар 129 адам көлік құралдарын жүргізу туралы арнайы құқығынан айырылды, 3 адамға әкімшілік қамау шарасы қолданылды. ҚР ҚК 345-бабы бойынша, (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) қаңтар айында 471 қылмыстық құқық бұзушылық тіркеліп, оның 45-іне қатысты іс сотқа жіберілді. Өткен айда ең көп ЖКО Алматыда тіркеліп, қалада 328 көлік апаты болды. Ал өлім-жітім бойынша Алматы облысы алдыңғы орында тұр, онда 21 адам жол апатынан қаза болды.