17-18 ақпанда Мемлекеттік хатшы Гүлшара Әбдіқалықова жұмыс сапарымен Жамбыл облысында болды.
Сапар барысында Г.Әбдіқалықова Мемлекет басшысы Н.Ә.Назарбаевтың Жолдауын талқылауға арналған Жамбыл облысы Қазақстан халқы Ассамблеясы Қоғамдық келісім кеңесінің «Қазақстанның Үшінші жаңғыруы – өсімнің жаңа моделі» атты кеңейтілген отырысына қатысты.
Іс-шараға, сондай-ақ, Жамбыл облысының әкімі, өңірлік Ассамблеяның төрағасы К.Көкірекбаев, Қазақстан халқы Ассамблеясы Төрағасының орынбасары – Қазақстан Республикасы Президенті Әкімшілігінің Хатшылық меңгерушісі Е.Тоғжанов, Жамбыл облысының этномәдени бірлестік жетекшілері, Алматы қаласы, Алматы, Оңтүстік Қазақстан және Жамбыл облыстарының қоғамдық келісім кеңестерінің мүшелері, мемлекеттік органдар мен БАҚ өкілдері қатысты.
Мемлекеттік хатшы Г.Әбдіқалықова өз сөзінде Мемлекет басшысы өзінің Жолдауында Қазақстанның Үшінші жаңғыруы бойынша бес басым бағытты айқындап бергенін атап өтті. Алға қойған міндеттерді іске асыру үшін барлық алғышарттар мен мүмкіндіктер бар. Бұл – Тәуелсіздіктің 25 жылында қоғам мен мемлекеттің жинақталған барша жасампаз әлеуеті, сондай-ақ күрделі жаһандық өзгерістер кезеңінде жұмыстың негізгі бағдарлары мен алгоритмін айқындайтын «100 нақты қадам» Ұлт жоспары.
Сапар шеңберінде, сондай-ақ Мемлекеттік хатшының төрайымдығымен М.Х.Дулати атындағы Тараз мемлекеттік университеті Байқау кеңесінің отырысы өтіп, онда жоғары оқу орнын одан әрі дамытудың өзекті мәселелері талқыланды.
Хамит ЕСАМАН,
«Егемен Қазақстан»
Жамбыл облысы