Мемлекет басшысы Нұрсұлтан Назарбаев Қазақстан халқына арнаған биылғы Жолдауында «Бірінші, еңбек өнімділігін айтарлықтай арттыру керек» деп атап көрсетіп, «Бұл жердегі негізгі фактор Төртінші өнеркәсіптік революция элементтерін жаппай енгізу болуға тиіс. Бұл – автоматтандыру, роботтандыру, жасанды интеллект, «ауқымды мәліметтер» алмасу, тағы басқа міндеттер. Үкіметке бизнес өкілдерімен бірге 2025 жылға дейін базалық салаларды технологиялық тұрғыдан қайта жарақтандырудың кешенді шараларын әзірлеуді тапсырамын», деген болатын. Жолдау жүктеген міндетке сай мемлекет тарапынан өнімділікті арттыруды ынталандыру бағытында белсенді жұмыс басталды. Қазіргі күні инновациялық өңдеуді, заманауи басқарушылық технологияларды енгізу және негізгі кәсіпорын қорларын жаңғырту бойынша ілгерілеу бар.
Мысалға, Инвестициялар және даму министрлігі мен «Қазақстандық индустрияны дамыту институты» АҚ бірлесіп, өндірушілерді ынталандыру бойынша жаңа сапалы стандартқа көшу, еңбек өнімділігі мен өндірістің тиімділігін арттыру жөнінде жоспарлы жұмыстар жүргізіп келеді. Осы мақсатта бірнеше жыл бұрын «Өнімділік-2020» бағдарламасы іске қосылған болатын. Бұл шараның арқасында өндірісті жаңғырту есебінен «Мұнаймаш» АҚ, «Азия Авто» АҚ, «Кентау трансформатор зауыты» АҚ, «СарыарқаАвтоӨнеркәсіп» ЖШС, «Стальцинк» ЖШС, «Оңтүстік Құрылыс Сервис» ЖШС заманауи жоғары технологиялық станоктар сатып алды. Нәтижесінде, аталған кәсіпорындарда еңбек өнімділігі 1,2-ден 2,8 есеге дейін артты. «КазСтройСтекло» АҚ, «АВЗ» ЖШС, «ЦинКаз» ЖШС, «Милх» ЖШС сияқты кәсіпорындар басқарушы және өндірістік технологияларды енгізу есебінен орташа еңбек өнімділігін 1,6 есеге дейін жеткізді.
Өткен жылы Қазақстандық индустрияны дамыту институтына «Өнімділік-2020» бағыты бойынша шығынды қайтару тәсілі арқылы 66 индустриялық-инновациялық қызмет субъектілерінен 88 өтінім түскен. Институттың қолдау құралы орталығы директорының орынбасары Диас Серіковтің айтуынша, әзірге 47 субъектінің 60 өтінімі мақұлданды, оның ішінде 58 өтінім бойынша шығындар қайтарылды. Былтырға бөлінген бюджет қаражатын түгел игергендіктен, 2 өтінімді қанағаттандыру ағымдағы жылы жүзеге асырылады.
Асхат РАЙҚҰЛ,
«Егемен Қазақстан»