Дәрігерлер елде жүр

Уақыт озды, заман өзгерді, өмір өсті деген осы шығар, күні кеше көпшілікке  қиялдай көрінетін істер бүгінде қалыпқы құбылысқа айна­лып жатыр. Мәселен, ауыл адам­да­ры сырқаттанып қалса, бұған дейін бір жағынан науқас  қысып, екінші жа­ғынан жол қинап еріксіз қала жа­ғалаушы еді ғой. Ал енді қара­саңыз,  жағдай керісінше. Білікті дә­рі­герлер жер-жерге оларды өздері іздеп келіп, денсаулықтарын тікелей тексереді. Бұл шара «Саламатты Қазақ­стан» бағдарламасы аясында жүр­гізілуде. Арнайы құрал-қондырғы­лар­мен жаб­дық­талған және мамандар­мен жа­сақ­талған облыстық ме­ди­ци­налық ор­та­лықтың жылжыма­лы диаг­ности­калық кешені  биыл алдымен Бұқар жырау ауданындағы Көкпекті ауы­лында бол­ды. 15 дәрі­гер таңерте­ңнен кешке дейін 500-ге жуық адамды тексеріп үл­герді. Ма­ңындағы Байқадам, Са­ры­төбе ша­ғын елді мекендерінің  тұр­ғындары да қаралды. Солардың бірі жас ана Динара Түгелбаева «Үш жасар ұлым Болсынның туғаннан жү­рек талмасы бар. Содан бері жыл са­йын Қарағандыдағы кардио­ло­гия­лық ор­талыққа  апарып, тексертіп жүре­мін. Қала ауылдан алыс. Барып қай­туға көлігіміз жоқ. Араға екі түнеп, балам да, өзім де шаршап-шалдығып қайтушы едім. Енді жа­қын жерден көрсетіп алуға  мүмкін­дік туғанына қуанып қалдым, – деп айтқанындай жергілікті жұрттың  медициналық қам­қорлықтың атал­ған түріне ризалықтары зор болып жатыр. Теміртау, Жезқазған, Балқаш қа­лалық денсаулық сақтау орын­дарында да құрылған осындай үш жылжымалы диагностикалық кешен де таяу арада  өз аймақ­тарын­дағы ауылдар арасына шыққалы отыр.  Адам денсаулығын қорғау, жақсарту мақсатындағы бұл іс-шара күзге дейін жалғасады. Айқын НЕСІПБАЙ. Қарағанды облысы.