Семейдің Жиенәлі ауылдық округіне қарасты 43-ші шақырымында еріген қар суы тас жолдың астындағы су өтетін өткелді бұзып кеткен. Жол да әрі-бері жүруге жарамсыз болып тұр. Қазір оқиға орнында қалпына келтіру жұмыстары атқарылып жатыр. Семейдің Затон бөлігіндегі кептелген мұздардың бөлігі Ертіс бойымен Шығыс Қазақстаннан сыртқары ағып кеткендіктен, қазірде қауіп сейілді. Семейге іргелес Бесқарағай ауданына қарасты бірнеше ауыл дәл осы Ертіс жағасында орналасқан.
Бұл тұста еріген қар суы мен үсті-үстіне құйыла жауған жаңбыр аудан маңындағы екі шағын өзенді және жерасты суларын тасытып жіберді. Соған орай, ауылда 9 үй, 10 аулаға су кіріп, 20 адам құтқарылды. Аудан әкімінің міндетін атқарушы Ерболат Рахметуллиннің айтуынша бүгінде жедел штаб құрылып, олар күндіз-түні жұмыстар атқаруда. Қосымша 40-50 адам көмекке келіп, 8 техника жұмылдырылып, су басқан жерлер тазартылған. Қауіпті тұстарға 6 мың тонна инертті материалдар төгіліпті. Әзірге тәулік бойы жүргізіліп жатқан жұмыстар мен сақтық шараларына орай Бірлік, Жетіжар ауылдары су тасқынынан аман.
Ертістің жағасындағы 500 тұрғыны бар Кривинка ауылын тасқыннан сақтап қалу үшін өзеннің мұзын жару жұмыстары шұғыл түрде қолға алынды. Семейдегі Төтенше жағдайлар басқармасы мен «Шығысжарылысөнеркәсіп» мекемелерінен келген 16 маман 600 килограмнан астам жарылғыш затты қалыңдығы 60 сантиметрлік мұзға қойыпты. Ал 130 үйге ескерту парақшалары таратылған.
Ертіс бойында жағдай әзірше бірқалыпты.
Раушан НҰҒМАНБЕКОВА,
журналист
СЕМЕЙ