Жақында Доха қаласында Қазақстан Республикасы Сыртқы істер министрінің орынбасары Қайрат Омаровтың Катар мемлекеті Сыртқы істер министрінің орынбасары Мұхамед Абдалла М. Әл-Румейхимен кездесуі өтті, деп хабарлады ҚР СІМ-інің баспасөз қызметі.
Кездесу барысында казақстандық дипломат өзінің әріптесіне алдағы 28-30 маусым күндері Астана қаласында өтетін Ислам Конференциясы Ұйымы Сыртқы істер министрлері кеңесінің 38-ші сессиясына қатысуға Катар Премьер-министрі – Сыртқы істер министрі шейх Хамад бен Джасим бен Джабер Әл Тәниге арналған шақыруы бар Қазақстан Сыртқы істер министрі Ержан Қазыхановтың арнайы хатын табыстады.
М.Әл-Румейхи Қазақстанда тәуелсіздіктің соңғы 20 жылында қол жеткізілген оң өзгерістерді атап өтіп, Президент Н.Назарбаевтың дамыған мемлекет құру қабілетін жоғары бағалады. Халықаралық күн тәртібіндегі өзекті мәселелер бойынша ынтымақтастықты одан әрі дамытудың зор әлеуетін білдіре отырып, катарлық тарап Қазақстанмен экономикалық, гуманитарлық салаларда, оның ішінде, конфессияаралық үнқатысуды одан әрі дамыту бағытында өзара әрекеттесуді тереңдете түсуге ықыласты екендігін білдірді.
Кездесу барысында Қ.Омаров сұхбаттасына Қазақстаның ИКҰ Сыртқы істер министрлері кеңесіндегі төрағалығы кезіндегі қызметінің басымдықтары туралы, сонымен қатар, сол кезеңдегі елімізде өткізілуі жоспарланған шаралар жөнінде әңгімелеп берді.
Жоғары лауазымды дипломат катарлық тараптың Қазақстанның ИКҰ-дағы төрағалығына барынша қолдау көрсететіндігін айтып, осы бір жауапты істе сәттілік тіледі.